كـلــيـة حــاســـبـات ... والـهـرى فـى الجــوافــة

فى احد احياء المعمورة ولحظة ظهور نتيجة تنسيق الثانوية العامة

حموكشة : بس انا كان حلم حياتى اخش هندسة
ابوه : مش مهم يا ابنى ... اهم بيقولو حاسبات مش وحشة برضه ... عليه العوض فى فلوس الدروس اللى دفعتهالك.
امه : بس يا راجل متقولش كده حرام عليك ... ابنك كبر وهيبقى محاسب قد الدنيا .... مش الكلية دى بتطلع محاسبين برضه يا ابنى ؟؟!

وفى مكان تانى خالص وفى نفس التوقيت

سيكا : الحمدلله يا بابا جتلى كلية حاسبات وملعومات
ابوه : قشطة يا ابنى ... يعنى انته كده هتفتح مركز كتابة رسائل علمية محترم .
سيكا : رسائل علمية ايه وبتاع ايه يا بابا ... بقولك حاسبات ... يعنى كمبيوتر ... يعنى هفتح اكبر سايبر فيكى يا منطقة ... وهجيب بقى بلاستيشن 5 (اساسا مفيش 5) وهعمل احلى شغل ... وكمان هخلى قودة كده لتصليح الكمبيوتر ... وبعدين يا بابا انا ليا خبرة جامدة جدا فى الكمبيوتر ... انا غير انى بعرف اسطب ويندوز ... بعرف اسرق ايميلات كمان ... وكمان ليا فى موضوع التجميع ده جامد انته نسيت انى انا اللى اشتريت الشاشة بتاعة ميشو ابن عمتى .
ابوه : اه اللى اتحرقت دى !!!
سيكا (وشه احمر) : ما هما بقى فى الكلية هيعلمونا بقى وهبقى جامد ان شاء الله.

وبعد حوالى شهر ونص من حزن حموكشة اللى ملهوش لازمة وفرحة سيكا اللى برضه ملهاش علاقة بالموضوع .... اتقابل حموكشة وسيكا فى اول يوم كلية ... وقعدوا على نفس الدكة.

سيكا : بعد اذنك يا زعيم متعرفش اول حصة هتبتدى امتى
حموكشة : حصة يا عم النجم ... زمن الحصص خلاص انتهى ... اسمها محاضرة ... واللى بيدى المحاضرة دكتور .... وعلى فكرة بقى مسمهاش دكة اسمه بنج.
سيكا : طب ما انا عارف انها مش حصة انا بس بهزر شوية اصل انا فرحان اوى ... اخيرا دخلت حاسبات وهحقق اللى نفسى فيه .
حموكشة : ايه يعنى هتطلع محاسب على رأى مامتى ... انا مش عارف ايه لازمة الكلية دى طالما ان كلية تجارة موجودة .
سيكا : تجارة ايه ومحاسب مين ... الكلية دى بتطلع مهندسين كمبيوتر ... يعنى ممكن تفتحلك سايبر او مركز صيانة اجهزة .... او شركة بيع حتى .... اساسا دى كلية جامدة جدا وهيدونا كل حاجة عن الكمبيوتر .... واحلى حاجة فيها بقى انى مش هذاكر خالص .... انا اسمى بين اصحابى عبقرينو علشان عارفين انى جامد جدا فى الكمبيوتر .... انا بس اللى عايزه من الكلية اتعلم ازاى اعمل شبكات علشان السايبر بتاعى ... وكمان لو علمونا بقى ازاى اربط البلاستيشن بالكمبيوتر يبقى 100.
حموكشة (والفرح باين فى عنيه) : يعنى مش هطلع محاسب زى ما امى بتقول .. احمدك يا رب .... وكمان هفضل مقضى طول الوقت على الكمبيوتر محدش يقولى تلت التلاتة كام ... وبلا هندسة بلا وجع دماغ انا مش ناقص مذاكرة.

طبعا الحوار مش حقيقى لكنه مقتبس من واقعنا المؤسف ... الواقع بايدينا يتغير والمقال موجه لكل من يهمه الامر ... سواء للطلية الجدد ودول انا بنصحهم بانهم يسألوا الناس اللى سبقوهم على الكلية ويا ريت حد عنده خبره كويسة ويا سلام بقى لو كان معيد او دكتور او خريج .... اما بالنسبة للطلبة الحاليين او الدكاترة او المعيدين .... فده دورنا احنا اننا نعرف الناس بكليتنا ونمحو الافكار الشبهات اللى عند الناس


ملحوظة : المقال ده انا كتبته السنة اللى فاتت وكنت كاتبه لمجلة كانت المفروض تتعمل لكن للاسف مشافتش النور حتى الأن وشكلها مش هتشوفه.
بعد صدور مجلة بيتنا عرضت على اللى ماسكينها انهم ينشروا المقال ووافقو ونزلت فى العدد ده.

بالمناسبة, دورنا اللى انا بتكلم عنه هنا مش ان احنا نروح نقول للناس كلية حاسبات دى كلية عظيمة ونمدح فيها للناس من حوالينا ونقول حاجات احنا مش عارفينها "نفتى بغير علم", أو اننا نتسبب فى اننا ننشر أعتقاد عند الناس ان كلية حاسبات مناسبة لكل الطلبة "لأنها فعلا مش مناسبة لكل الطلبة".

أنا اللى كنت ناول أعمله ساعة ما كتبت المقال من سنة, هو فيلم تسجيلى عن الكلية, كنت هصور مع كل الدكاترة والمعيدين المحترمين والناس اللى سافرت شركات كبيرة زى Microsoft والناس اللى حضّرت ماجيستير ودكتوراه, واحنا فعلا السنة اللى فاتت انجزنا جزء كبير أوى من الشغل ده لكننا توقفنا لعدم توافر كاميرا نكمل بيها الشغل, لكن ان شاء الله ده حلم وهنحققه باذن الله.