[حــــرَّكــهـا] مـقـــــشّـة

كتبت س :

ماما: أخيرا الراجل خلّص.

أنـــا: طب كويس يا ماما أنه عمل بإتقان, كان ممكن يخلّص بسرعة و يعمله أي كلام.

ماما: طيب, أدخلى هاتى الفلوس عشان نحاسبه.

وأنا داخلة سمعت كلمة رنّت في وداني.

العامل: عايز مقشّة

أنا طبعا : عايز مقشة يعمل بيها إيه !

فين و فين أما أستوعبنا أنه عايز يكنس مكانه, عشان كان فيه شوية رمل علي الأرض بعد ما خلصّ شغله.

ماما: مش مشكلة حضرتك, دي حاجة بسيطة هنبقي نكنسها أحنا

والراجل لسّة مصمم علي موقفه

و مافيش غير حاجة واحدة اللي خلتنا ندخل نجيبهاله:

العامل: مش هينفع أمشي و أسيبلكم المكان كدة... "المسلم إذا حلّ مكان تركه أفضل مما كان".

الراجل دة علمني حاجة مهمة أوي, علمني حاجة يمكن كنت عرفاها قبل كدة, بس عمري ما كنت حطاها في دماغي وأنا داخلة أي مكان, عمري ما كنت أفكر يا تري بعد ما أمشي هسيب المكان دة أفضل إزاي.

وكمان الراجل ده لما حب يحــــرَّكــهـا متكسفش يطلب مـقـــــشّـة