لا لحكم العسكر .. سلموا السلطة

ملحوظة: أنا كتبت الموضوع ده قبل ما أدخل الجيش, وأنا حاليا مفصول عن العالم ومعرفش ايه اللى بيحصل برة, ومش عارف هبقى عايش ولا ميّت وانتوا بتقروا الكلام ده, بس أنا عايز أشارك معاكم ومفيش قدامى وسيلة تانية للمشاركة غير أنى كتبت الموضوع ده وأطلب منكم وأشجعكم كلكم على المشاركة فى الجمعة دى.

مش هقدر أنزل معاكم بكرة لأنى فى كلية الظباط الاحتياط فى فايد, لكن محدش يقعد فى بيته بكرة, انزل ومترجعش إلا والمطلب متنفذ, حتى لو هتبات فى التحرير شهر, مقدامناش غير أننا ننزل ونعمل اللى علينا. انزل واوعى تمشى, واوعى الميدان يبان فيه أن المطلب ده مطلب فئة معينة أو تيار واحد. علشان ننجح لازم نرجع لروح التحرير أيام الاعتصام.

45 يـوم

مرة كتبت حاجة كان عنوانها "النهاية" وكنت معتقد ان دى النهاية فعلا, وكنت فقدت الأمل نهائيا. لكن ربنا عزوجل بعدها بفترة قدر أنه يكون فى فرصة تانية, وطلعت النهاية مش نهاية انما بداية جديدة.


دى أخر رسالة هكتبها وأنا "مدنى" لحد ما أخلص الجيش. وهى لعامة الناس وخاصتهم, لأهلى وأصدقائى والناس اللى بحبهم :). محبتش عنوان رسالتى دى يكون فيه نوع من الوداع أو اليأس, لأنى اتعلمت من درس "11.11.11" أن ربنا بايده كل حاجة وممكن ييسر كل حاجة ويجعلنا الخير فى الحاجات اللى عمرنا ما نتخيل ولا نتوقع أن فيها خير. ويرزقنا الخير بطرق أبعد من اللى احنا بنتصورها. 45 يوم هى أول وأطول فترة (متصلة) هقعدها فى كلية الظباط الاحتياط فى فايد منقطع عن الدنيا واللى فيها.

اتصورت الصورة دى النهاردة علشان لو حد عايز يشوفنى قبل ما أدخل الجيش, أو يعملى عمل ;)

11.11.11

اليوم ده كنت بتمنى و مخطط أنه هيكون يوم تاريخى فى حياتى وحياة ناس تانية, جه اليوم واللى كنت مخططله متحققش النهاردة, احساس مش سهل أبدا أن حلم من احلامك ميتحققش. وبعد النهاردة مش عارف هيتحقق ولا لأ (بس أنا لسه عندى أمل وحسن ظن بربنا). مش مهم ايه الحدث اللى كان هيبقى تاريخى, بس المهم ليه محصلش ؟ وايه اللى انا استفدته وحابب أشاركم بيه.

من المدنية للعسكرية

لسه فاكر فرحة أبويا وحضنه ليا فى اليوم اللى جبت فيه نتيجة الثانوية العامة وكنت مفرحه بمجموع كبير فى سنة ثالثة عوض تقصيرى فى سنة ثانية ورجعله الأمل انى ادخل كلية محترمة زى كلية حاسبات ومعلومات, يوميها شغلى اغنية "من الثانوية للكلية" وكان ليها طعم مختلف الحقيقة. دلوقتى لو فى اغنية بتوصف حالتى فأكيد هتبقى "من المدنية للعسكرية", وعلشان الأغنية دى مش موجودة فأنا حابب أكتب هنا للذكرى وللى مهتم  يعرف.

البداية الحقيقة

اللجنة الثقافية بها مرشحان مستقلان ومرشح لدينا ومرشحان من القائمة الأخرى, فقررنا دعم المرشحان المستقلان وعدم تصعيد مرشحنا فى منافسة القائمة الأخرى, وواجهنا هنا بعض الصعوبة فى اقناع المرشحة المستقلة بالأمر, وكان يبدوا انها لا تثق فى كلامى, وخاصة أن هناك من قال لها (حسب روايتها) أننى أقصد خداعها وطلب منها ان تدعمه وهو سوف يتنازل لها, وهناك أيضا من خوفها بأن الاخوان يريدون السيطرة على الاتحاد وكلام اخر من هذا القبيل, وهنا تدخل الأصدقاء وكان لهم الأثر البالغ فى طمأنتها قليلا بأنى لا اكذب عليها ولا أحوال خداعها.

بعد اعلان النتائج مع أصدقائى كريم الجبالى واسلام يوسف

شهادة المشير أمام المحكمة

دى الشهادة المتداولة على الانترنت للمشير.

أنا ليه نشرت على الرغم من حظر النشر ؟؟ أنا بتحدى قرار حظر النشر علشان أولا الكلام اللى قاله المشير مش بيضر فى مصلحة مصر أبدا وحضرته مقالش أى أسرار. ثانيا أن من حقنا نعرف لأن دى بلدنا. حاجة كمان من حقنا كمان نعرف اللى بيحكومونا واللى "حمو الثورة" بيفكروا ازاى !!.

إلى أبى 5

سفرك صعّب الأمور عليا جدا, كل مرة بتبقى أصعب من اللى قبلها, بس المرة دى الظروف أسوأ.


حضرتك كنت قلتلى يا اما تكمل وتعمل المستحيل, يا اما تنسى للأبد. انما مينفعش تفضل فى الحالة دى علطول. فى الحقيقة الموضوع ده بالنسبة لى حلم, عمر حضرتك سمعت عن حد بيتنازل عن حلمه بسهولة ؟ أو بصعوبة حتى !؟

هو يمكن يبان انه حلم صعب تحقيقه أو مستحيل حتى. بس مستحيل ايه هو مين كان يصدق أن حسنى مبارك يتنحى, أقول لحضرتك على سر ؟ فاكر لما حضرتك اتصلت بيا وقالتلى مش هيمشى وانا قلتلك لأ هيمشى ان شاء الله. ساعتها انا مكنتش متخيل أبدا انه هيمشى وكنت بقول كده علشان أحاول أقنع نفسى ان المستحيل ده ممكن يتحقق. بل انا كان ممكن أرضى بأقل من ده وامشى من الميدان (من كتر ما الموضوع ده كان مستحيل). وربنا قادر على كل شئ وأهو اتحقق فى زمن قياسى كمان الحمدلله.


يمكن مش فى ايدي أكتر من أنى اعمل زى ما حمزة نمرة بيقول "بس احنا نحلم". بس الحلم ده مش النوع اللى بيتحقق بالاعتصام 18 يوم فى التحرير, محتاج مجهود أكبر. ادعيلي.

ملحوظة: يوم الاربعاء هعرف انا ظابط ولا عسكري, دعواتك.