[حــــرَّكــهـا] واجـب الـحــسـاب

كتبت: فاطمة سالم
نقلا عن مدونتها "fw!tema"

طبعا مساعدة الناس ده مبدأ في حياتي انا الشخصيه الحمد لله ده, غير انه في الاساس حاجه بيأمرنا بيها الاسلام, بس مساعده الناس دي مش فلوس و لا كلمه طيبه و بس.

لا دي فكره لما بفكر فيها بعمق شويه كده, بلاقي ان مساعدة الناس دي ممكن نسميها حاجات كتير, ممكن نسميها دور في المجتمع أو نسميها احساس بأخواننا في الدين و في الانسانيه أو نسميها أثره أو حاجات كتير جداا.


من يجي ثلاث سنين كده كنت بتفرج علي فيلم اسمه pay it forward





بطل الفيلم ده طفل, والطفل ده ايجابى جدا, بيدور على 3 أشخاص ويأثر فى حياتهم بشكل ايجابى من غير أى مقابل, لكن بشرط وحيد, ان كل واحد فيهم يعمل نفس الموضوع ده مع ثلاثة غيرهم, وهكذا.

عجبتني الفكره جداا, و فضلت ادور اعمل ايه في حياه مين وازاي ؟ و مش عارفه و مش لاقيه الحاجه اللي انا متخيلاها.

لحد ما في يوم كده خبطت علي بابنا بنت البواب, عندها واجب حساب و واجب لغه عربيه وعايزة حد يساعدها.
و بابا و ماما مكانوش موجودين, وهمّا في العاده اللي بيقوموا بالموضوع ده, لاني بكون يا امّا نايمة يا لسه راجعه من الكلية, يا امّا أى حاجه.

كنت باكل, قلت لها معلش انا باكل دلوقت تعالي بس كمان نص ساعه و سيبيلي اللي انتي عايزاه اكون فهمت ايه الموضوع نظرا اني نسيت الحاجات دي نشرحها ازاي للاطفال.

المهم بعد شوية طلعت قعدنا بتاع ساعتين بنشرح ازاي نحول كل القيم لنفس التمييز و نرتبهم, و في الاخر عملتلها جدول تحويل من مللي ل لتر و الكلام القديم ده.

و جيت كمان كام يوم كان عندها امتحان عديت عليها اشوفها عملت ايه, و لأول مره ادخل حجرتهم المتواضعه, و نطت ساعتها في دماغي الفكره بتاعة الفيلم.

قلت الطبقه دي اكتر طبقه اللي فيهم نفسه في العلم, نفسه فيه بجد عشان هو سبيل الحصول علي المكانه الاجتماعيه و عشان حاجات كتير اوي.

قلت طيب ليه ما اخدش البنوته دي ابث فيها كل حاجه من حب قرايه و قيم و مهارات كومبيوتر و كل حاجه اقدر اعملها ؟؟ و فعلا اتفقت معاها اني همتحنها في كام موضوع هي تختارهم من كتب الدراسه بتوعها, و لو نجحت و ذاكرت تمام هعلمها ازاي تشتغل علي الكمبيوتر.

و الاختبار ده كان عشان اعرف ايه مدي حماسها للموضوع, و فعلا نجحت البنت و تمام و بدأت معاها اول معرفه للكومبيوتر, وربنا يقدرنى على الخطوة دى.