[حــــرَّكــهـا] محـل الـشـــنـط

كتبت س:

كنا في Club Aldo (محل أحذية و شنط) فكانوا في المحل حاطين صورة كبيرة أوي معلقين عليها كام حذاء كدة, بس الصورة فعلا بشعة جدا, عيب أوي يحطوا حاجة زي كدة, و كمان حاطين منها كذا واحدة.


كلنا شوفناها و خرجنا وماحدش فينا اتكلّم -تقريبا من الصدمة- فوقفنا شوية برة المحل قاعدين بنرغي في أي حاجة و فجأة واحدة فينا جابت سيرة الصورة دي.

يلا نروح نقولهم عليها.

طب يلا تعالي.

لا حد يجي معاية.

لا أنا لأ مش عارفة أقول إيه !!

ممكن تقولي الصورة دي مخلة للأداب العام.

طب تعالي معايا وأنا اللي هتكلم.

أوك.

واحدة ربنا يكرمها لعامل في المحل:

لو سمحت ممكن نتكلم مع المدير؟

خير في حاجة ؟

لا كنا بس عايزين ندى feedback.

شايفين الراجل اللي قاعد هناك دة؟ روحولوا.

البنتين راحوا و قالوله علي الكلمتين اللي حفظوهم :D

حاضر يا فندم هنشيلهم حالا.

و فعلا بعدها بدقيقة كانت كل الصور دي اتشالت الحمد لله.

علي الرغم أننا فرحنا أنهم استجابوا, حاجة تزعل أوي, كام واحد دخل قبلينا المحل ده و شاف الصورة دي و سكت ؟! للأسف ناس كتير.

علي الرغم أن الموضوع مكانش محتاج غير أن الواحد يكون مركز أنه عايش في الدنيا دي و له دور فيها, و يحط في دماغه: أنا إيجابي... أنا شجاع... أنا هعمل اللي عليّ و اللي يحصل يحصل.

و كأن ربنا بيفوقني و بيفكرني إني أركز شوية مع الدنيا اللي حوليّا,ربنا بيقول فى كتابه "كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنْكَرِ وَتُؤْمِنُونَ بِاللَّهِ وَلَوْ آَمَنَ أَهْلُ الْكِتَابِ لَكَانَ خَيْرًا لَهُمْ مِنْهُمُ الْمُؤْمِنُونَ وَأَكْثَرُهُمُ الْفَاسِقُونَ" (110)