واحــــدة بــتــحــبـك أوى

بكلم زيكاس على ال mail, وبخلص شوية حاجات على الكمبيوتر, أخواتى قاعدين فى نفس القودة, كل واحد مشغول بحاجة, وماما كانت بتعمل حاجة فى البلكونة وبتتكلم مع اخواتى.

بس يا ماو, هو ده الموضوع.

طيب بالله عليك يا زيكاس أدعيلى.

قشطة يا جامد.

الموبايل قعد يتهز جنبى, اكيد ده SMS, انا مبحبش الموبايل يعمل صوت لما تجيلى رسالة, يمكن واحدة تبعتلى رسالة ولا حاجة على رأى بابا (أكيد مش للدرجة دى :D).

ده أكيد زميلى اللى بيبعتلى كل أسبوع رسالة فيها حديث شريف, والله جزاه الله خيرا, فتحت الرسالة ويا ريتنى ما فتحتها.

ده كان مضمون الرسالة

حبيبى انت عامل ايه ؟؟
يا رب تكون بخير.
أنا واحدة بتحبك أوى.

أنا اتصدمت, والمشكلة الكبيرة, مش عارف أبين تعابير وشى, علشان لو حد لاحظ, هتبقى مشكلة, وبعدين مين دى اللى ممكن تبعتلى رسالة زى كده.

هو أنا ايه اللى بيحصلى ده يا زيكاس.

فكك يا ابنى, اعتبر ولا كأن حاجة حصلت.

ولا حاجة حصلت ازاى, هو ليه أنا بيحصل معايا ده كله ؟؟

كل اللى أقدر أقولهولك متشغلش بالك بالحاجة دى.

ورسالة زى دى متجيش غير وماما واخواتى قاعدين ؟؟  أنا دماغى بتجيب يمين وشمال, لازم أتصل وأعرف ايه اللى بيحصل ده, لكن ازاى وماما قاعدة قدامى ؟؟

بعد شوية الموبايل بيرن, ياللهول, نفس الرقم اللى بعت الرسالة هو اللى بيتصل, أكيد مش هرد قدام العائلة كلها على واحدة بعتتلى رسالة بتقولى انا بحبك قوى, قمت عملت الموبايل صامت, وكملت اللى انا بعمله على الجهاز, وحاولت أكون طبيعى, بس فى الغالب كان واضح ان فى حاجة.

بعد شوية التليفون رن مرة تانية, نفس الرقم, أكيد فى حاجة غلط, مهو لو واحد صاحبى وبيحاول يرخم عليا أكيد مش هيتصل بيا علطول, الطبيعى ان انا اللى اتصل بيه وهو اللى ميردش, مش هو اللى يتصل أكثر من مرة, المهم عملت نفس اللى عملته المرة اللى قبلها, الموبايل صامت وكملت, ولكن, لاحظت ان ماما واقفة قريب من الستارة.

ايه يا ماما فى ايه (بتراقبينى ولا ايه ؟؟ شكلك هتعرفى :S:S).

لأ مفيش حاجة.

الموبايل رن مرة ثالثة, مش معقول كده.

ايه يا اينى مترد ؟؟

ايه ؟؟

ايه مش بترد ليه ؟؟

لأ مهو هيتصل تانى (مش لاقى حاجة أقولها).

مجدى اتصل بيا على تليفون البيت, وأنا بكلمه لقيت الموبايل رن مرة رابعة, قلت استغل الفرصة, وأعمل حركة صايعة, علشان محدش ياخد باله.

ايه يا عم مجدى خلاص مش كل شوية ترن.

ايه بتقول ايه ؟؟

يا عم بطل رخامة بقى.

رخامة ايه يا ابنى مش فاهم حاجة !!

طيب خلاص عرفنا أقفل بقى, انته بارد.

انته عبيط يا ابنى ؟؟

بعدها قمت قفلت الموبايل, من غير ما حد ياخد باله, أعتقد كفاية لحد كده.

قاعد مش على بعضى, وعايز أقوم أنزل أتصل وأشوف مين ده, يا ربى ارحمنى من اللى بيحصلى ده, ماما شكلها حست أن فى حاجة, قمت أشرب مياه وانا مطمئن شوية ان التليفون مش هيرن وانا بعيد عنه, لأنه مغلق.

الموضوع فضل شاغلنى حوالى ساعة, وبعدها قدرت أعرف بالصدفة البحتة مين اللى بعت الرسالة دى.

ماما كانت اشترت موبايل وخط جديد, وهى اللى بعتت الرسالة, وهى اللى كانت بتتصل بيا وهى قاعدة جنبى, ولما كانت ورا الستارة مكانتش بتراقبنى, انما كانت بتخبى الموبايل وهى بترن عليا.

ماما متعمليش كده تانى.

ههههههههه, وعمال تقول لصاحبك بطل تتصل :D:D, وبعدين قفلت الموبايل.

أعمل ايه بس.

طيب ومردتش على الرسالة ليه ؟؟

يعنى أرد أقول ايه ؟؟

ترد تقول وانا كمان بحبك أوى.

وانا بكتب الموقف, افتكرت كمية المشاعر المتلخبطة اللى حسيت بيها فى نفس الوقت.
بس عرفت قد ايه هو جميل ان يكون فى واحدة بتحبك أوى.