[حــــرَّكــهـا] كـــيـرى بــــونــــد

كتب ميمو:

بمناسبة الاجازه السعيده ، احب اهنيكم و اقدملكم قصه قصيره
وعلى فكره القصه مقتبسه من قصه حقيقه .
بطلنا هو كريم مرزوق حسنين ابو العافيه - شهرته كيرى - طالب فى كلية الحاسبات و المعلومات عين شمس، بيحب وطنه و بيدافع عنه بكل اللى يقدر عليه.
مش كدا و بس دا كمان بيحب الكليه و بيحب زمايله و نفسه الكليه تبقى احسن و تتقدم اكتر و اكتر.

قصتنا بتبدأ من قبل الامتحانات بيومين، بيدخل كريم على CISCLUB و بيلاحظ ان فى شوية شباب بادئين حملة ضد الغش.

" و بعدين يا كريم .. لحد امتى هتفضل كدا " بيكلم نفسه

كريم كان بيغشش اصحابه فى امتحانات كتير .. و اهو كله خير برضو و مساعدة الناس واجب يتشال على الراس من فوق.
لكن المرادى فى شئ عجيب .. كريم قرر انه نفسه يشارك فى الحمله دى .. نفسه يبطل غش .. نفسه يحس انه عمل حاجه صح فى حياته.

"ربنا يوفقك يا كريم ،سمّى قبل متحل يا حبيبى وابقى طمّنّى عملت ايه" والدة كريم.

بطلنا رايح اول امتحان و هو مقرر انه هيأخد خطوه صح فى حياته .. هيبطل يغشش حد، طبعا نازل قبل الامتحان بساعتين يدوبك يلحق يركب حاجه بتروح عباسيه.

"بسم الله الرحمن الرحيم، يا مسهل" بدأ الوقت، الامتحان اتوزع.
"الحمد لله الامتحان كويس،يا رب بس الحق اخلص" بيقول لنفسه.
"اهم حاجه يا جماعه اتأكدوا انكوا كاتبين اسمكم صح زى الورقه الملزوقه عندكم" مراقب.
" كريم، واد يا كريم .. " واحد حرامى.
" ششششش .. " كريم بيرد عليه.
" يابنى انجز .." نفس الحرامى
" بس يابنى سبنى اركز " بيرد كريم فى حزم.
" ياض انتا هتحور انجز هو صح و غلط ايه ؟" ما زال بيحاول.

المراقب يأخد باله منهم .. و الغريبه عادى ولا كأنه شايفهم !!!!

"يا كريم انجز .."
" يابنى المراقف واقف اهو، فكك بقى " كريم بيحاول يثبت على موقفه.
" مراقب ايه يابنى .. انا مظبطه فكك منه" بيرد عليه.
" مظبطه ؟؟؟ " كريم فى قمة الاستغراب.
" ايوه ياض انجز هقولك بعدين " يستكمل الضغط.
" يا كريم ... كريم .. " و اخيرا كريم يقرر انه يقفل ودانه.

يخلص الامتحان و بطلنا الحمد لله حل كويس و مبسوط .

" عملت ايه يا كريم ؟" واحد كويس.
" الحمد لله تمام ، و انتا ؟"
" اه يا عم الامتحان كان كويس الحمد لله".
" ولا يا كيرى... انا هموتك يلا" نفس الحرامى.
" يا عم فى ايه ؟ "
" ايه اللى فى ايه؟، انا مش عمال اندهلك و بقولك انجز .. انا سايب حجات كتير فى الامتحان"
"طيب و انا اعمل ايه يعنى ؟ منتا شوفت اللجنه كانت عامله ازاى"
" يابنى لجنه ايه .. انا مدى الراجل 10 جنيه و هايسبنى اغش".
" ايه ؟ راجل مين دا .. مش دول يابنى معيدين ؟ "
" معيدين ايه .. لا فى عمال بيراقبوا علينا و اللى انتا شوفته دا واحد منهم ".
" اممم ... طب و ليه تعمل كدا يعنى ؟"
" عادى يا عمى قشطه .. هو حد لاقى!"
" حد لاقى ايه بس .. "
" و بعدين على فكره هو اللى عرض علينا الأول "
" علينا؟... هو مش انتا بس اللى عملت كدا ؟ "
" لا يابنى ناس كتير ، امال يابنى هننجح ازاى .. اعتبرها فلوس راحت فى اى درس يا عمى "
" اه طيب .. بقولك انا نسيت اكلمهم اطمنهم عليا ، ثوانى بقى "
" افف ... استغفر الله العظيم .. ايه دا للدرجادى !! " كريم بيكلم نفسه
" الو ايوه يا ماما .."
" ها يا حبيبى عملت ايه ؟"
" الحمد لله الامتحان كان كويس و حليت كويس "
" طيب يا حبيبى الحمد لله عقبال الباقى يا رب"
" ان شاء الله "
"طيب ما تتأخرش بقى هاه"
" حاضر ،انا اصلا يدوبك الحق اجى عشان ازاكر "
" ماشى يا حبيبى يلا سلام"
" سلام" .

كريم يرجع البيت و هو فى قمة الاستغراب من اللى شافه فى اليوم دا،و فضل يفكر كتير فى اللى حصل.

يبدأ يوم جديد و امتحان جديد ، و لازال صاحبنا بيأخد من الناس فلوس عشان يسيبهم يغشوا.

" دكتور .. ممكن اروح الحمام؟ " الحرامى بتاعنا.

راح الحمام و رجع مبسوط - هو معروف ان الحمام بيت الراحه - بس مش للدرجادى .. اكيد فى سبب تانى .

>>>> معلومه لمن لا يذهب الى الحمام فى الامتحانات .. المراقب لازم يروح معاك لحد باب الحمام و يرجع معاك <<<<

" ها عملت ايه النهارده ؟ " كريم بيسأل الحرامى
" عيب يا شقيق، صاحبك مظبطنا ".
" مش فاهم .. "
" يابنى انا روحت الحمام و قولتله معايا حجات على الموبايل عاوز ابص فيها، قالى ماشى بس بسرعه".
" بجد ؟؟؟؟"
" ايوه يابنى .. بيس موت يعنى، بس كله بتمنه يا برنس ".
" بقولك ايه يا عم انا هروح اشتكى الراجل دا .. مهو مينفعش كدا "
" لا يابنى انتا عبيط ، تشتكى ايه هتقطع عيشه و ممكن تلبسه مصايب "

بعد شويه تيجى ناس حرامية تنضم للحوار ..

" يابنى انتا عبيط ؟ بطل هبل .. " حرامى تانى
" اصل هتقول ايه .. انتا مالك اصلا؟ " كمان واحد
" بقولكم ايه .. انا هعمل اللى هيريحنى و خلاص انا طالع .. "
" كريم .. يابنى ... طب اسمع بس .. " واحد منهم
" يا جماعه هو كريم راح فين ؟" صديق قريب لكريم.
" طلع يا عم فوق ، روح شوفو بقى ".

يوصل صاحب كريم قبل ميكمل كريم الطريق و يحكيله اللى حصل و طبعا يشجعه و يطلعوا مع بعض.

" سلام عليكم ، دكتور .. كنا عاوزين نقول لحضرتك حاجه .. " كريم بيقول لرئيس اللجان.
" و عليكم السلام .. اتفضل .. خير ؟"
" يا دكتور فى حد فوق .. بيأخد فلوس من الناس و يخليهم يغشوا .. "
" نعم ؟؟؟ " الدكتور يرد فى استغراب شديد .
" ايوه يا دكتور .. ياإما يروح الحمام يشوف حاجه .. يا اما يسيبه يغش من حد فى اللجنه "
" امم .. بس انا مقدرش اتكلم معاه فى حاجه زى دى .. بص انا عاوزك تساعدنى فى حاجه ممكن ؟"
" طبعا يا دكتور .. "
" طيب بص يا سيدى .. الامتحان الجاى امتا ؟؟"
" يوم الخميس ان شاء الله الساعه 1"
" جميل .. انا عاوزك يوم الخميس .. تتفق معاه انك عاوز تغش "
" اه .. حضرتك عاوز تمسكه متلبس يعنى .. "
" ايوه عليك نور .. يا اما مش هنعرف نعمله حاجه .."
" خلاص ماشى يا دكتور ان شاء الله "
" بس اسمع ... مش عاوز مخلوق يعرف اللى قولناه دا دلوقتى .. "
" حاضر يا دكتور، متقلقش ".
" ماشى يا جماعه الف شكر .. هشوفكم الخميس بقى ان شاء الله .. بعد اذنكم ".
" ان شاء الله، اتفضل يا دكتور ".

" ها طيب .. ايه النظام؟ " صاحب كريم.
" ولا حاجه .. ربنا يستر بقى"
" ايوه بقى يا كيرى .. بقيت عميل سرى".
" يا عم عميل سرى ايه بس .. انا خايف اوى".
" اجمد .. السجن للجدعان"
" سجن ايه ، الله يخربيتك ".
" هبقى ازورك اتنين و خميس و اجبلك حلاوه معايا"
" طب يلا بقى من هنا بدل مموتك و ادخل السجن بجد"

" ها يا كريم عملت اللى كان نفسك فيه خلاص و ارتحت ؟ " واحد حرامى.
" يا عم يعمل ايه .. انتا عبيط .. انا قولتله لا طبعا و خليته ينزل " صاحب كريم.
" ايوه يا جدعان منا برضو بقوله كدا .. مينفعش اللى هو عاوز يعمله دا .." حرامى تانى.
" خلاص بقى يا جماعه انتو حرين انا كنت عاوز اريح نفسى و خلاص ، انا همشى بقى سلام" كريم.
" طيب فل، خدنى معاك بقى ، سلام يا جدعان ".

و تمر الايام .. الساعه 12 و نص يوم الخميس ... فى المكتب

" خلاص يا كريم ؟؟ " رئيس اللجان.
" حاضر ان شاء الله "
" و مش عاوزك تخاف خالص انتا ملكش دعوه بأى حاجه ".
" ماشى "
" طيب يلا روح انتا بقى على اللجنه و ربنا معاك ان شاء الله ".

يبدأ الامتحان .. و جرى الأمر على العاده ، كل شئ زى ما هو .. و رئيس اللجان بيراقب.

"دكتور .. ممكن اروح الحمام " كريم بيكلم الضحيه.
" تعالى .."
" هى دى الاشاره .. " رئيس اللجان بيكلم نفسه.

يروح على الحمام و يدخل واحد فيهم و يقفل عليه و يترقب الضحيه بكاميرا الموبايل...لما وصلوا الحمام ، كريم كان محضر التسجيل بالمكروفون فى الموبايل بتاعه ..

" بقولك ايه .. انا معايا حجات على الموبايل عاوز ابص فيها .. بس معيش غير 50 جنيه اول لما اخلص الامتحان هفك و هديلك ماشى ؟" كريم .
" ماشى ، مفيش مشاكل " الضحيه.
" هو X كام بيديك كام ؟ "
" 10 جنيه "
" خلاص ماشى .. انا هدخل بقى اخلص و اجى بسرعه ".
" طيب بسرعه بس عشان اللجنه ".

و خلص كريم .. و رجع هو و المراقب على اللجنه .. الغريب ان رئيس اللجان كان ظاهر بالكاميرا و صور كل اللى حصل .. و لكن سبحان الله .. لم ينكشف .

بعد نصف ساعه تقريبا ..

" انتا ... تعالى .. " رئيس اللجان.
" انا ؟؟ " الضحيه.
" ايوه ... تعالى .. اخلص ".

و انكرت الضحيه انها عملت حاجه زى كدا كما كان متوقع .. و لكن التسجيل الصوتى .. والكاميرا اكدت الحادثه .. و كان الاجراء هيتم بعمل محضر .. و لكن اكتفى رئيس اللجان بحرمانه من المراقبه مره اخرى .. مع الجزاء الشديد و العادل .

" انا حاسس انى غلط لما عملت كدا .. " كريم بيقول لصاحبه .
" ليه بقى ان شاء الله ؟؟ مش اخد جزائه خلاص ؟ .."
" ايوه .. بس تقريبا كان مفروض احذره الأول .. قبل مقطع عيشه كدا "
" يابنى منتا شوفت اهو .. معملوش حاجه .. هو بس حرمه من المراقبه تانى و حذره ".
" على رأيك .. يلا الحمد لله ".

بعد لحظات فى مكتب رئيس اللجان

" كريم .. بجد انا مش عارف اقولك ايه .. شكرا جدا ".
" يا دكتور انا معملتش حاجه .. شكرا على ايه بس ".
" ماشى يا بطل ربنا يوفقك فى بقيت الامتحانات ان شاء الله ، و لو عوزت اى حاجه ابقى قولى على طول متتأخرش ".
" ان شاء الله يا دكتور .. سلام عليكم ".
" مع السلامه ".

" ايوه يا عم كيرى .. مين قدك " صاحب كريم
" يا عم مين ادى ايه بس .. "
" بس خد بالك بقى لحسن ينتقم منك يا عم العميل السرى .. "
" طب اتنيل بقى و اسكت .."
" ماشى يا كيرى بوند".