التقديم للخدمة العسكرية

التجنيد الاجباري :S:S.

مجرد التفكير فى الموضوع ده بيخلى الواحد عنده احباط, ومخلى الواحد تفكيره فى المستقبل واقف, لا عارف هيشتغل فين ولا امتى ولا هيعمل ايه فى الفترة القادمة, بس اهو مكتوب علينا أمرنا لله.


وعلى رأى واحد بيقول "المرض تاج على رؤس المرضى, لا يراه إلا المجندين" :D:D.
الموضوع ده للناس اللى متوقعين ان عندهم جيش, أما المحظوظين اللى عارفين انهم مش داخلين (الوحيد والذى منه) فده مش مكانك :D:D.



الموضوع ده هنتكلم عن ازاى نجهز ورق الجيش, وفى مواضيع تانية هنقول الخطوات التانية, بس طبعا تجهيز الورق هيحتاج مشواير بالهبل فاستعدوا من دلوقتى علشان نلحق نقدم ورقنا قبل رمضان بدل ما نتسحل.


أولا: التصوير:
عايزين 8 صور بالمواصفات الاتية:

1. خلفية بيضاء.
2. شعر قصير.
3. بدون ذقن أو سوالف.
4. 4 * 6.

ثانيا: القيد العائلى:

وده محتاج مشواير كتيرة شوية وهتكون كالاتى:

1. نموذج 40 من البوسطة.
2. روح السجل المدنى هتجيب الاتى:
1.  شهادة ميلاد كمبيوتر لكل من (حضرتك, والدك, والدتك, اخواتك, زوجة أبوك لو متج واحدة وز واحدة تانية).
2. قسيمة جواز (والدك مع والدتك أو والدك مع زوجات أخرى).
3. قسيمة طلاق (لا قدر الله) (والدك مع والدتك, أو والدك مع زواجات أخرى).
4. شهادة وفاة أى حد متوفى.

باستخدام كل الشهادات اللى انته طلعتها دى + نموذج 40, من السجل المدنى برضه طلع قيد عائلى, وده أهم حاجة لأنه هو اللى هيروح ورق الجيش مع شهادة ميلادك.

طبعا خد معاك 150 جنيه احتياطى :D:D.

ثالثا: فيش جنائى من قسم الشرطة.

رابعا: روح أى مستشفى حكومى واعمل تحليل لفصيلة الدم.

خامسا: روح الكلية, وطلع من شؤون الطلبة الاتى:

1. بيان نجاح.
2. البطاقة العسكرية (6 جند).

المشوار الأخير, روح مكتب التجنيد التابع للقسم بتاعك واديهم الورق الاتى (ونصيحة حط الورق فى دوسية بلاستيك محترم علشان هتلف لفة محترمة بالورق ده, ونصيحة كمان, صور من كل ورقة 5 نسخ وإلا هتتكدر):

1. البطاقة الشخصية
2. شهادة ميلاد كمبيوتر.
3. القيد العائلى.
4. الفيش الجنائى.
5. 4 صور شخصية (+ 4 احتياطى).
6. تحليل فصيلة الدم.
7. بيان النجاح.
8. بطاقة 6 جند.

يلا عايزين نشجع بعض بقى ونروح نخلص الورق ده, لأن المفروض تقديم الجيش هيبدأ يوم 25/7, وفى ورق بياخد وقت على ما يطلع, وعايزين نلحق نروح نقدم قبل رمضان.