[حــــرَّكــهـا] أجــــرة اســكـنـدريـة

كتب عبدالمنعم دياب "Diab":


بما إنى اسكندرانى, واتكتب عليا انى أدرس فى القاهرة فلازم أشوف ويل السفر والتعب فى كل مرة اسافر فيها وانا راجع للبيت.


وفى مرة من هذة المرات الكريمة, كان يوم خميس وللاسف الشديد مكنتش عامل حسابى انى اركب قطار (انى احجز فيه), فقلت :"خلاص , هاركب ميكروباص زى مابتقولوا (مشروع زى ما احنا بنقول ).


الفكرة ان الميكروباصات بالضرب و احنا كنا فى عز الحر و كانت الساعة 5, المهم انا مركبتش الا الساعة 8 تقربيا كدة (بعد المغرب).


ركبت و قعدت فى اخر كرسى والعربية مشيت, وفنص الطريق الأسطى طلب الأجرة 

يا ناس الأجرة (25 او 30 جنيه).

مش فاكر الصراحة بس الفكرة ان الاجرة الاساسية ب 20 جنيه بس و الراجل كان بيستغل لنا عشان كان يوم الخميس, و كل الناس مسافرة.

فبدأت الكلام مع السواق

يا اسطى مش الاجرة 20 جنيه بس ولا ايه ؟؟!!

لا ده 25 جنيه (و هو بيلم الاجرة فى نص الطريق على الصحراوى).

انا الصراحة كبرت فى دماغى و قلت الراجل ده مش هيستغلنى مهما كان حتى لو كانت نهايتى و بدأت معاه مناقشة حاده.

يا اسطى الاجرة دايما ب 20 جنيه ليه الاستغلال فى الوقت.

النهارده الخميس و حضرتك عارف.

عارف ايه, يعنى انا لما اركب معاك فى نص الاسبوع اقولك الاجرة ب15 جنيه ؟! نفس الاستغلال اللى انت بتستغله ليا.

هو كدة مش عاجبك انزل.

أنزل !! انزل فين ؟؟!!

ولان السواق كان للاسف معاه مساعد (تباع )فدخل فى الحوار هو التانى

ايه يا استاذ هو كدة و لو مش معاك فلوس مش مشكلة.

لا يا بابا انا معايا بس مش هادفع الا 20 جنيه.

و طبعا عشان اتكلم بثقة لازم اعمل حاجة صح, اتصلت باخويا و قلت له على الوضع عشان يكون ليا دعم, صحيح هو مش جنبى بس الدعم ده افادني كتير.

وللأسف كأنى راكب لوحدى, مفيش حد من الركاب نطق بكلمة (الا الراجل اللى جنبى), لكنه دفع الفلوس للاسف

لحد هنا و السواق ماشى بالعربية, راح السواق موقف العربية و فتح العربية من ورا عشان يكلمنى (هو كان طوله فارع)

ايه يا استاذ مش هتدفع و لا ايه ؟

لا مش دافع.

و نفس الوقت اخويا بيقول لى

خد يا ابنى نمرة العربية و هو مش هيدخل من البوابه لو انتى حصل لك اى حاجة.

و توالت الاحداث و كانت النتجية انى قعدت ازعق و اشتم فى البلد و اللى فيها (بلطجة بقه لظن السواق و التباع انى مسنود) وانا فعلا كنت مسنود على الحق.

مجموعة الرجال اللى كانوا معايا (و هما و لا رجالة و لا حاجة ) لم يفعلوا شيئا و كانوا متفرجين, لكن فى النهاية دفعت 20 جنيه بس مش اكتر, ووصلت بيتنا و انا منهار من حالة السلبية اللى الناس فيها.

انا حركتها بس مكنش فى حد عايز يحركها معايا !
و اخدت صورة لرقم العربية للذكرى (انى وقفت وقفة فى يوم ما).