الـلــحــــظـة الأخــيــــرة .!!!

لما يتكلم عن العذاب فى القبر يهرب منه ... ولما يجيب سيرة سكرات الموت يحاول يغير الموضوع
ولو قاله متنساش انك هتدخل قبرك لوحدك وهتسأل فيه لوحدك ... بيعمل نفسه مش سامع

غريزة فى الانسان انه يبص لقدام ... ووظيفة الشيطان انه يهيأ للانسان ان البداية هى النهاية ... وبالتالى الانسان بيعمل على ان البداية نهاية وينسى ان دى اصلا بداية ... وان النهاية الحقيقة هو معملش حسابها

ايوة الدنيا بداية مش نهاية ... الدنيا اختبار والاختبار بداية مش نهاية ... ونهاية الاختبار مش النهاية ... لأن لسه النتيجة والمكافئة او والعياذ بالله العقاب .


كم مرة فى حياتك فكرت ان ربنا هيحاسبك يوم القيامة عن كل كبيرة وصغيرة فى حياتك ؟؟
كم مرة وانته بتعمل اى عمل قلت يا رب انا بعمله علشانك ؟؟
كم مرة افتكرت انك هتدخل قبر لوحدك ؟؟وهتسأل فيه لوحدك ؟؟
طب يا ترى جهزت نفسك للقبر ده ؟؟
جهزت نفسك لسؤال الملكين "من ربك , ما دينك , من نبيك"

عمرك فكرت فى يوم من الايام ان ربنا هيسألك عن الصلاة اللى انته تاركها ؟؟
عن الحجاب اللى انتى مهملاه ؟؟؟
عن السجاير اللى مش عايز تبطلها ؟؟
عن عقوق والديك اللى انته مش واخد بالك ان ده اصلا كبيرة من الكبائر ؟؟
عن النميمة والغيبة والاساءة للغير ؟؟
عن لبسك الضيق اللى بتشوهى بيه صورة البنت المسلمة ؟؟

هل فى يوم فكرت انك تحاسب نفسك ؟؟؟

طب امتى ؟؟؟ هتتوب امتى ؟؟؟ مستنى ايه ؟؟
اليوم بيعدى وراه اليوم ... يمكن يوم تقول بكرة ... بس تضمن منين ان بكرة يجيى ... تضمن منين ان ملك الموت ميجيلكش دلوقتى .

الصحابة رضوان الله عليهم كانوا دايما بيحاسبوا انفسهم
واحد من الصحابة كان عنده قبر فى بيته وبينزل فيه كل يوم يحاسب نفسه
جرب مرة كده تدخل قودة وتطفى النور وتنام على الارض وتخيل ان دى اللحظة الاخيرة ... يا ترى لو فعلا دى اللحظة الاخيرة هتقابل ربنا ازاى ؟؟؟ هتقوله ايه يوم القيامة ؟؟

هتقوله ايه لما يسألك عن القران اللى مش بتشوفه ولا تفتكره غير فى رمضان ... هتقوله ايه عن جيرانك اللى بيسبوا الدين وانته محاولتش تنصحهم ... هتقوله ايه عن قرايبك اللى بينكم وبينهم مشاكل بقالكم سنين وقاطعين الرحم بينكم ... هتقوله ايه عن شغلك اللى فيه رشاوى وانته كنت بتسكت ... هتقوله ايه عن الاطفال اللى بيموتوا كل يوم من الجوع وانته بتاكل احسن اكل ... هتقوله ايه عن اخواتك اللى بيموتوا كل يوم فى العراق وفلسطين ؟؟؟ هتقوله انته عملت ايه للاسلام ... قدمت ايه لدينك ؟؟؟ يا ترى هتقوله ايه؟؟

انا هحكيلكم حكاية حصلت معايا واثرت فيا جدا .
فى مسجد من المساجد فى رمضان كان فى دورة تغسيل وتكفين ... وفكرة الدورة هى ان الشيخ هيعلم الناس ازاى يجهزوا الكفن وكيفية تغسيل الميت وكيفية التكفين ... وكان محتاج واحد متطوع يمثل دور الميت والعبدالفقير الى الله كان هو المتطوع ده

حاولت انى اكون زى الميت فعلا ... مكنتش بتحرك ابدا غير الحركة اللى الشيخ كان بيحركهالى

ولما كان الشيخ بيحرك ايديى او رجلى او راسى ...كنت بقول فى نفسى دلوقتى انا سايبه يتحكم فى تحريكى بمزاجى ... انما اخر يوم مش هقدر اتكلم ... مش هقدر ادافع عن نفسى ... مش هقدر اقوله لا

وبعد حوالى 20 دقيقة من تعليمهم كيفية التغسيل
جه وقت اللحظة الاخير
جه وقت الكفن
ذلك الثوب الابيض الذى لا يتمناه بشر

اخر ثوب هنلبسه فى حياتنا ... بس المرة دى غصب عننا
بالمناسبة الشيخ قال كلمة هزتنى .. قال ان السيدة لما بيكفنوها بيلبسوها حجاب ... اللى مش راضية بقى تلبس حجاب وهى عايشة وتقول حرية شخصية هتلبسه غصب عنها وهى نازلة قبرها

وبعدين كلهم التفو حواليا علشان يلبسونى كفنى ... ساعتها كنت اقدر امنعهم انهم يعملوا فيا اى حاجة غصب عنى ... انما فى اليوم الموعود مش هقدر اتفوه بكلمه

وفى النهاية

ودى هيبقى مثوانا كلنا ... يا ريت تفكروا كويس ... يا ريت نستعدله كويس ... يا ريت نفكر فيه دايما ونعمل حساب اليوم ده

وفى اللحظة دى سمعت "رب ارجعون" "رب ارجعون" "رب ارجعون"

انا جربت الكفن وعرفت قد ايه هو صعب ... بجد مش قادر اوصف ... ومن يومها وانا بتمنى انى ملبسش كفن تانى ابدا ... اللهم قبرا بلا كفن ... اللهم قبرا بلا كفن ... اللهم قبرا بلا كفن

طبعا انا بكيت بشدة بعد اما قفلوا عليا الكفن ... وكان فى طفل من الاطفال اللى حواليا سألنى انته بتبكى ليه ... يا ترى لو انته مكانى هترد تقوله ايه ؟؟؟

ملحوظة :
1 - دى مش دعوة للتشائم ... دى دعوة للتفائل ... عيش حياتك بس عيشها صح ... عيشها لله
2 - اسمعوا الاناشيد دى
تؤمل يوما - أبت نفسى