مبروك على ايه بس ....
انا بعتبر نفسى فاشل
قولى يا فاشل .. يا فاشل
لا لا مش هقولك كده ان شاء الله السنة الجاية تعوض وبرضه مبروك
اصل اللى حصل كالاتى
التليفون رن .... خيراللهم اجله خير .. ده عيـــد
خوليو : سلامو عليكو .
عيد : وعليكو السلام.... النتيجة طلعت وحمزة شال بيزنس.
خوليو : ربنا يستر .
التليفون رن .... خيراللهم اجله خير .. ده عيـــد تانى
خوليو : سلامو عليكو .
عيد : وعليكو السلام.... النتيجة طلعت على التليفون وحافظ جابها.
خوليو : مش قلنا محدش يجيبها من على التليفون ..بلاش تجيبها انته كمان يا عيد احنا هنقاطع.
عيد : حافظ شال بيزنس.
خوليو : ربنا يستر ... واستنى لما تنزل فى الكلية بلاش تجيبها .
عيد : هحاول.
التليفون رن .... خيراللهم اجله خير .. ده عيـــد تالت
خوليو : سلامو عليكو .
عيد : وعليكو السلام
خوليو : اوعى قولى انك انته كمان جبتها.
عيد : مقدرتش.
خوليو : مش مهم طب عملت ايه.
عيد :برضه .
خوليو :ربنا يستر ... اناشكلى هحصلكو .
طبعا كان لازم امهد الطريق للنتيجة لانها اصبحت على الابواب
بابا حصل كذا كذا كذا وكل صحابى شايلين نفس المادة وانا شكلى هشيلها او ممكن اخد درجات رأفة فيها او.. او.. او... الخ .
ليه كده يا ابنى احنا عايزين الكورة تيجى فى الجون من اول مرة مش هنقعد نعيد ونزيد.
بص يا بابا احنا نصبر لحد اما نتزل فى الكلية لانى مش هجيبها من التليفون لانى مقاطع زى ما حضرتك عارف وادعيلى بقى اليومين دول وان شاء الله ممكن اجيب امتياز... واضعف الايمان يعنى جيد جدا .
الكلام ده قلته على اساس ان انا كان قدام عينى هدف بسعى اليه وبحاول اوصله بشتى الطرق
غير كده كل اما اقابل حد مهما كان سنه او مرحلته الدراسية اقعد اقوله ذاكر ذاكر ذاكر ذاكر.
واسلام عبدالحكيم كان كل اما يقولى تعالى نتمشى بعد صلاة الجمعة اقوله اصل انا عايز اذاكر او عايز انام لانى تعبان من المذاكرة .
مش عارف شكلى كنت بزاول نفسى ولا ايه..... يمكن كنت بقنع نفسى انى بذاكر....لأ بس انا فاكر انى كنت بقعد على الكتاب وبمسك ورقة وقلم واحل واحفظ وكده ...
لأ وايه كنت مفهم صحابى انى السنة دى مش فاضى خالص لانى ورايا هدف عايز احققه ... قال ايه كان نفسى اطلع الاول على الدفعة واتعين معيد .... دلوقتى علشان اشتغل فى الكلية لازم اعمل علاقة قوية مع عم فتحى ... علشان يشغلنى معاه
يا بابا مهو مش انا بس ده تقريبا 70% او اكتر من الدفعة شايلاها
لو تفتكر انا قلتلك كلمة وانته رايح امتحان الفيزياء فى الثانوى .. مش عايزك تبقى واحد من الناس .. انا عايزك تبقى واحد غير كل الناس واتنه دايما كان بيبقى ليك موقف من حاجات كتير ... وساعات مكنتش بتسمع كلامى لانك كنت بيبقى ليك وجه نظر مختلفة .
وبعدين دى مش مادة اساسا انا مش عارف ليه الدكتور واخدها بجد كده .. وكمان الترم اللى فات كان عندنا مادة زيها والدكتور كان بيكرهنا كره العمى ومع ذلك عداها
عذر اقبح من ذنب ... طالما عندك مادة يبقى المفروض تذاكرها وتعمل اللى عليك انما انته مذاكرتش غير اخر يومين زى كل الناس.
ايوة يا عمو جبتها ونجحت ... بس ...
بس ايه ... شلت بيزنس.
اه مش انا بس ده كلنا .
كده ضاعت عليك مرتبة الشرف.
هى ايه مرتبة الشرف دى وضاعت ازاى.
مهو لازم تجيب نفس التقدير 4 سنين علشان تاخد التقدير مع مرتبة الشرف .
ايه يعنى لما اروح اخطب واحدة اقولها مش معايا مرتبة...والله شكلها هتبقى حور عين زى ما عيد قالى.
ماما بقى مزعلتش ... او بالاحرى حاولت تخفف عليا بانها متبينش حزنها وبررت عدم زعلها بان انا اعترفت انى مذاكرتش المادة دى
لكن فى حاجة مهمة اهم من المادة دى
المادتين دول .... انا جايب فيهم التقدير المتدنى ده ليه .
على رغم من صعوبة الامتحانين الا انى حليت فيهم كويس جدا لانى الحمدلله ذاكرتهم كويس جدا وكنت خارج من واحد فيهم زعلان انى مش هجيب الدرجة النهائية... ولقيت نفسى جايب درجة انا من راييى انى لوكنت اكتفيت بحل نص الامتحان كنت خدتها.
اتصلت على الفور بالدكتور استاذى المعنى بالمادة اللى كنت زعلان انى مش هقفلها ... وقلتله... قالى مهو اصل التصحيح كان فيه شوية حاجات هبقى اقولك عليها بعدين لما ابقى اشوفك بس انته متزعلش نفسك بس انته خليها على الله
مهو على الله كل شئ ... والحمدلله على كل شئ ... وأنا راضى بقضاء الله وقدره... وعارف انه ابتلاء من ربنا وربنا يلهمنى الصبر ... ويلهم كل المبتلين فى كليتنا دى الصبر.
اصل بصراحة أغلب اللى اعرفهم شايلين ... ناس محترمين جدا جدا جدا سواء بنات او ولاد يعنى مثلا عدنا *** وفى كمان ***** دول مثل لاتنين شاب متحرم وبنت محترمة والاتين شالو مادة .
وفى ناس طول السنة منفضين على الاخر ومنفضين لكل حاجة وفى الاخر عادى يعنى عدوا ... بس دول مش مشكلتى دول ربنا وفقهم الحمدلله وربنا يزيدهم وانا بتمنالهم الخير.... انما بقى لما يجيى حد زى ناس كده فعلا مش عارفين اقل القواعد وابسطها فى اى مادة ودايما كل سكشن (اذا حضروا ) نفس الاسألة اللى تدل على عدم الدراية احنا فى كلية ايه اساسا تلاقيهم عدوا برضه.
وفى ناس محترمين جدا جابوا تقديرات كويسة جدا زى مثلا *** او ****** وبرضه **** دول ناس محترمين جدا ويستاهلوا كل خير وده مش من عندى وانما لو سألت اى حد فى الدفعة هيقول نفس الكلام.
لو حد سألك بقى قوله انك جايب مادة
لأ انا مش عايز حد يعرف عنى اى حاجة
ليه ... خليهم يعرفوا انك شلت مادة علشان تبعد العين عنك ..وبعدين ده الواقع ودى الحقيقة ودى غلطتك واتحمل .
يمكن متكونش دى نهاية العالم بس الواقع دلوقتى .... ولو حد سألنى ... هقوله انا جبت ملحق
ملحوظة : لو حاسس ان الموضوع متلخبط وواجهتك صعوبة فى ترتيب الافكار فياريت تعذرنى لان ده اللى جوايا فعلا.
20 التعليقات:
ههههههههههههههههههههههههههه
ايوة ايوة
مش انت لوحدك ياعم
متكئبش نفسك
ونبقه نضبط بعض مع عم فتحي بقه
عشان نضمن مستقبلنا
بالتوفييييييق
وطبعا ده اول الطريق مش اخرو
كلنا تقريبا حاسين نفس الاحساس
بس لازم مانخليش الشيطان يفرح بينا و يقول: عرفت أحقق هدفي كدة بالاحباط دة مش هايذكروا السنة الجاية
فعلا لو الواحد مؤمن أن ربنا رحيم بي أد ايــــــــــــــــــــــــــــه هيرضي.
أنا حصلي كدة عشان الرحمن كان عايز كدة
"إن الله لا يضيع اجر من احسن عملا"
فمتنساش كده و ان شاء الله كمان كام سنة هتعرف ان الحمد لله اللي حصل ده كان احسن حاجة حصلت ...
بالنسبة للتصليح والتقديرات القليلة, فدي كليتك, بتبدأها وانتا كلك حماس, وعامل حسابك ان في مادة كذا..هتجيب امتيار..جيد جداً حتى, وتتفاجئ بتقدير تاني, وتكون المادة دي بالذات ذكرتها كويس جداًوإديتها حقها, مش كدة وبس, لا حليت كويس في الإمتحان, لا مش كدة وبس, طلعت مطمن وراجعت كمان..
لما تجيب تقدير مش كويس في مادة انتا مزاكرتهاش مش بتزعل, لان اخدت قد اللي انتا تعبته, لكن لما مادة تكون تعبت فيها اوي ويحصل ده, فعلا بيحطم, وبيدمر أي حماس جواك للاجتهاد والالتزام في الكلية, وبيحسسك ان تنفيضك للمادة دي ومزاكرتها في الاخر كان زيه زي ما بالظبط زاكرتها على اخر يومين..
مفيش شعور اوحش من انك تتعب ومتلاقيش نتيجة تعبك لان حد خسف بيه الارض..
عامة أنا داخل بس عشان اقوللك, من هنا لحد ما تتخرج لسه هتلاقي من ده كتير وأنيل, وان ده ولا حاجة, واتعود من دلوقتي عشان كل مرة متصدمش, اعمل اللي عليك, وفي الاخر متتوقعش اي حاجة في المقابل.. والا في كل سنة ليك هتفضل تتحطم..
بالنسبة للمادة اللي شلتها, فأول ما هتمتحنها السنة الجاية هيطلعلك تقدير الترم التاني, ولما بتتخرج مش بيبان انك شلت مادة اصلا, بيكون كإنك امتحنتها ونجحت فيها من أول مرة بتقدير "مقبول", اللي بيبان وبيفرق هوا انك تعيد السنة..
وعايز اقوللك, انك سواء اتخرجت من الكلية دي بتقدير ضعيف او امتياز, كتقدير عام, المهم مستواك واللي اتعلمته برة الكلية مع نفسك كاجتهاد شخصي, لان اللي اتعلمته في الكلية ميحصلش 20 % من اللي المفروض تتعلمه, لما تعمل interview فملوش دعوة باي حاجة في الدنيا غير حاجتين:
1) انك خريج كمبيوتر ساينس.
2) مستواك ايه ؟ عن طريق اختبارات واسئلة هتتسألها..
أنا فاكر اني كنت مرة شلت مادة, وجبت تقدير قليل.. في مادة تانية, مكنتش زعلان نهائي ابدا على المادة اللي شلتها لاني مزاكرتهاش فعلا ولا تعبت فيها.. لكن اللي زعلي وكسرني هيا المادة التانية اللي جبت فيها تقدير قليل.. وده مش بيحصل على مستوى فردي, لا بتلاقي ناس كتير زيك كانو واثقين تماما من مستواهم واداءهم في المادة دي..
هتاخد من ده كتير, اتعود, واستنى اللي جاي!
لا تعليق الكلام كان ممكن يكون باسلوب تاني .. عموما ربنا يوفق .. و الاسلوب التاني ده مهواش انك ترتب الافكار او كده .. انا قصدي علي الافكار نفسها ..
عموما معلش لو كنت شيلتها و أديك قلت .. ناس كتير شايلينها ..
و نصيحه مني ليك .. مش لازم كل أفكاررك تتفرد كده ..
و آخر كلامي .. سلام
عموما حصل خير يا خوليو .. و ربنا معانا .. احنا دفعه غلبانه جدا ..
قدر الله و ما شاء فعل ..
و عسي ان تكرهوا شيئا و هو خير لكم ..
ياسمين
هوا انت كمان كنت ضحية البيزنس
بجد اللي حصل لنا الترم ده اووفر
تلات ارباع الدفعه شايلين بيزنس وفيزيا
انا صحيح شايلة مواد تانية
اصدي يعني هعيد السنة يعني
عشان شلت فيزيا وبيزنس وماث 2 وبرمجة
وماتتخضش
لسة في انترو الترم الأول
بس اللي غايظني مووووت
درجة البيزنس واخدة 12.5
ده معناه ان انا ماكتبتش حاجة خالص
مع ان انا كنت حالة حلو في الميد تيرم
مش عارفة النص درجة ده يعني حاطها ليه
بجد والله انا زعلت على الناس اللي تقديرهم نزل عشان مادة مش أساسية
انا ماكنتش بزاكر بجدية أوي
بس والله حرام
انا فيه اصحابي تقديرهم نزل او ضاع التقدير منهم عشان بيزنس !!!!!!
والله احنا دفعة غلبانه أوي على رأي ياسمين
ومعليش ياخوليو
ان شاء الله تتعوض المرة الجاية
خيرها في غيرها
ومحدش عارف الخير فين على رأي بابا
:D:D:D
وربنا مابيعملش حاجة وحشة
اولاً يا خوليو اهنئك بالبلوج بمواضيعة و استفتائته الجريئة ... و انا برضه كنت عامل بلوج بس سبته بقى عشان مش بحب الناس تعرف حاجات عنى :D:D هى أفكار غريبة انا عارف .
المهم اخش فى الموضوع انا برضه شيلت بيزنس للاسف و الترم الاول جايب جيد جداً و الغريب انى لما جمعت درجات السنة لاقتنى جايب جيد جداً برضه بس اسمى شايل بيزنس و على درجتين بذمتك اى تعليم ده و اى بلد دى يا حسرة عل البد و التعليم والله . و انتة بتقول انك كلمت الدكتور و قالك اصل حصل ايه و مش عارف ايه . اى حجة و تبرير ممكن يقوله على المهزلة دى لما واحد يعيد السنة عشان شايل بيزنس ده يبقى اسمه ايه ؟؟ انا والدى كان متوقع انى هجيب امتياز و دايماً كنت بقوله ازاى يعنى دى صعبة قوى فالى يعنى اللى بيجبها احسن منك فى ايه ؟؟ و والله العظيم يا خوليو دى اول مرة اشيل فى حياتى او اسقط و لما اسقط اشيل بيزنس .
انا والدى كان واعدنى بحاجة كده هيجبهالى لما اجيب امتياز و على الاقل جيد جداً بجد لما شاف الحسرة فى عينى و القرف اللى شفته هيجبلى الحاجة دى الحمد لله . و على فكرة برضه انا نفسى ابقى معيد بس بصراحة كل ما يجيلى حبة امل بيضيع فى ساعتها مش عارف ليه ؟؟ يمكن من مستوى الكلية يمكن انى مش واثق فى نفسى يمكن انى غبى بجد مش عارف و للاسف الموضوع ده مضايقنى حاسس انى من غير هدف ابدا فى اى مسئلة برمجة مخى بيقفل علطول مع انى الحمد لله مستوايا لا بئس به و يمكن احسن من ناس تانية الله اعلم . مش عارف اعمل ايه بجد عامل زى واحد فى وسط البحر مش عارف اروح فين ولا منين.حاسس انى لما اتخرج مش هشتغل فى مجال البرمجة حاسسس انى ضايع اوى بجد.مع انى والله لسه راجع من عمرة من كام يوم بس حسيت بعديها براحة نفس و لكن رجعت تانى كده
معلش طولت عليك و ممكن اكون خرجت برة الموضوع بس بجد كنت عايز احكى اللى جوايا
بمبو /// او محمد عزالدين
اه نسيت اقول الحمد لله والله انى عديت من السنة المقرفة دى و تخيل بيقولو ممكن مش اطلع عشان البروجكت بتاع السمر كورس
يلا ما هى كووووووووووووسة
بسم الله الرحمن الرحيم
السلام عليكم ورحمة الله وبركاته.
مش عارف ليه أنت مكبر الموضوع كده بجد.
يعني أنا عارف ان أنت مؤمن وده قضاء ربنا وقدره ولا أيه.
وعلى فكره لو ليك حاخه هتاخدها يعني هتاخدها لو مش السنه دي يبقى اللي بعدها
وأعتذر لو طولت
أولا:احب اهنيك لأن طريقتك في كتابة الموضوع تحفه احسن من الكتاب.
ثانيا:عاوزه اقولك لو انت تستحق اكتر من كده ربنا ما عمرو ما حيظلمك في حياتك يعني مثلا ان شاء الله تجيلك شغلانه محترمة بمرتب محترم ....
ثالثا : انت مش لازم تبقى معيد عشان تتميز انت ممكن تتميز في اي حته و تبقي احسن من المعيدين مليون مره
رابعا : انا كرهت شغلانت المعيد دي بسبب كذا معيد كانو بيدونا مش كلهم
عادى
و بكره الكبوه دى
تكون سبب لنجاح كبير
ربنا معانا ...
ايه ده ايه ده- انت ياد بتكب الحجات ديه من امتى - وخليو .... ايه خليو ديه اه ما هو ماحدش عارف اسمك الحقيقي الي بنقولهولك في البيت - على العموم انا مش هاسيح - بس انت نظفت كده ليه وبقيت تكتب
والف مبروك على بلوجك وكتاباتك وسلاطاتك وبابا عنوججك.
شد حيلك ولو عايز حاجة من امريكا قلي وانا مش هاجبها علشان مش فاضي .... وبعدين مش فلنا نبطل نلعب في الشارع مع عيد - ومين سكبندو ومش عارف ايه ما علينا - المهم انا مبسوط منك ياد يلا سلام
عمرو
لا مؤاخذه غلبا افتكرت اخويا - بس على العموم خير انا مبسوط من بلوجكك - بس دوس - يلا
@عمرو
والله انا اتشرفت بحضرتك وجزاك الله خيرا على المرور واتمنى ان المدونة تكون فعلا عجبتك ومتكونش بتجامل اخوك
على العموم جزاك الله خيرا ... وانا اخوك برضه مش ياسر بس ;)
ماشي يا عم خليو - ياسر قالي عنك - على العموم شد حيلك - بجد مبسوط من الحجات ديه ان فيه ناس بتبعر عن الي جواها وباي لغه وباي شكل - المهم انك تتكلم - يلا لو احتجت حاجة قلي
وانا برده مش هاحبها علشان مش فاضي ;)
طيب عملت ايه علشان تخرج من الحاله دي ؟؟
و تقدر تاني تمسك كتاب و تذاكر؟؟؟؟؟
@ غير معرف :
السؤال ده بيتسأل ليه ؟؟؟ هل علشان تستفيد من التجربة عامة بعد كده ؟؟؟
ولا علشان انته أو انتى محبط دلوقتى وعايز تلحق تذاكر علشان احنا فى وقت امتحانات ؟؟؟
تاني واحده و احتمال اول واحده ربنا يستر
@ غير معرف :
قسوة التجربة دى انها كانت أول مرة تحلصى فى حياتى ... انما اللى كان مصبرنى هو ان كل الناس اللى أعرفهم تقريبا كانوا شايلين نفس المادة ....
لكن أنا عزمت انى ان شاء الله لو جت مادة زى دى تانى لازم اذاكرها كويس علشان.
وكان لازم اثبت لأهلى انه مش معنى انى شيلت مادة يبقى أنا وحش ... فذاكرت فى الاجازة وعملت مشروع "شطرنج" ... وكنت بحل مسائل ACM.
لكن للاسف الشديد انا شلت مادة تانية فى الترم اللى بعده ... وكانت مادة شبه اللى انا شيلتها دى ولنفس الدكتور .. مع انى كنت ذاكرتها لكن قدر الله وما شاء فعل.
http://5olio-speak.blogspot.com/2009/03/blog-post_14.html
وفى المرة الثانية الموضوع كان أصعب بكتير ... وكان الكلام اللى بسمعه حواليا مؤلم جدا ... وكان قدامى حل من الاتنين يا أما أختفى أو اثبت وجودى.
وعلشان الواحد يعدى من أزمة زى دى لازم يعمل الاتى
1- "يَا أَيُّهَا الَّذِينَ آمَنُواْ اسْتَعِينُواْ بِالصَّبْرِ وَالصَّلاَةِ إِنَّ اللّهَ مَعَ الصَّابِرِينَ" ... ادعى كتير واتذلل لربنا وقوله انا مليش غيرك.
2- نظم وقتك
http://cisclub.com/forum/showthread.php?t=8805
3- خلّى عندك دافع
يعنى أنا مثلا كان من داوفعى أنى أفرّح والدى اللى بيتعب وبيشقى فى الغربة علشان خاطرنا ... وانا نفسى أفرحه بدل ما انكد عليه كل ترم كده .
4- فكر كده فى حال الأمة وتأخرها ... وان تقصيرنا هو سبب تأخر أمتنا ... وان احنا لو اجتهدنا ربنا هيكرمنا ويوفقنا ويخلينا سبب من اسباب تقدم الأمة.
وافتكر كده يوم القيامة لما تقابل رسول الله صلى الله عليه وسلم وانته بتقوله يا رسول الله انا كنت بذاكر وبجتهد علشان ميقولوش ان الملتزمين مش بيهتموا بالعلم. وكنت بذاكر وبجتهد علشان أطلع مسلم متعلم ومتميز يفخر به المسلمين ... علشان مبقاش سبب ان الناس تتهم الأسلام بأنه دين كله تخلف ورجعية وارهاب .
أتمنى أنى أكون أفدتك .. وان شاء الله خير
إرسال تعليق