حوار مع بينديكت

المكان : منطقة باب الشعرية .
الزمان : من حوالى اسبوعين كده .
الشخصيات حسب الظهور : سكار, خوليو , طوبة , بينديكت
تفاصيل المشهد : كل واحد شايف شغله ... اللى ماسك (رولة) وبيدهن الحيطة .... واللى ماسك فاس بيرزع شجرة ... واللى ماسكة فرشة بتدهن السور الحديد .... يعنى من الاخر خدمة عامة
سكار اشتغل كتير اوى النهاردة واتخنق وعايز يستريح شوية
وطوبة مش سايب حد فى حاله عمال يبوظ التيشرتات البيضة اللى وزعوها علينا بالرولة اللى فى ايده
اما خوليو(العبدلله) فكان عمال يعترض ويقول ازاى بس تيجوا فى المكان ده مع الناس دى .... وايه الهبل اللى مشغلينه فى الدى جى ده (أصل كانوا جايبين دى جى) وايه البنات المايصة دى ... لا لا انا عايز اروح انا مش هقدر اكمل ... احنا كده اتدبسنا ... لا لا انا مش هسمع كلامكو تانى .

اصل الحوار ان احنا اتدبسنا فى خدمة عامة ... بس مش اى خدمة عامة .... المرة دى مع وفد اجنبى ... جاى تبع جمعية تبادل ثقافات اسمها AFS .. والجمعية دى ليها فروع كتير حول العالم ... هدفها الظاهر تبادل الثقافات .. مهمتها انها تسفر الشباب من جميع انحاء العالم الى جميع انحاء العالم علشان يحصل تقريب للثقافات ...والوفد اللى كان شغال معانا فى الخدمة العامة كان بقاله 9 شهور فى مصر ... وكان فى جنسيات مختلفة فى الوفد ده ... امريكان على يابانين على ألمان وطبعا كان معاهم مرافقين مصريين تبع الجميعة .... بيسافروا لدول كتير بس بينى وبينكم المصريين اللى معاهم من شكلهم معرفتش انهم مصريين خالص غير لما اتكلموا معانا(تغيير ثقافات مش تبادل ثقافات).

سكار : ايه يا خوليو اللى احنا فيه ده .
خوليو : نعم يا أخويا انته مش قلت نزود الخير فى المكان اللى فيه شر يعنى من الاخر انته اللى جايبنا هنا.
سكار : بس انا كان نفسى اننا نكلم الناس دى عن الاسلام وكده دى فرصه مش هتتعوض.
طوبة قام جايب الرولة وعلى ظهر خوليو بوظله التيشرت قام خوليو بصله كده وقاله .
خوليو : بقولك ايه اكتبلى اسمى بالبوية على التيشرت من ورا.
طوبة : ما انته رايق اهو امال عاملى نفسك فيها عبدو المعترض ليه.
خوليو : امال عايزنى افضل خانق نفسى وخلاص اكتب اكتب هو احنا كنا دافعين فيه حاجة.

وفى نفس الوقت كان بينديكت شكله قرفان من حياته وواقف لوحده جنبنا وبيدهن الحيطة.

سكار(لبيندكت) : دونت ادهن هير بيكوز هير هيبقى انوزر كلور.
بينديكت تجاهل سكار وكمل دهان برضه.

خوليو : شكله مش فهم انته عايز تقوله ايه امال انجليزى ايه وبتاع ايه.
طوبة : يا كابتن متدهنش هنا علشان هنا لون تانى .
بينديكت : ازاى هنا لون تانى؟؟؟؟؟
خوليو : ايه ده انته بتتكلم عربى .
بينديكت : ايوة انا بتكلم عربى شوية.
سكار : طب بص هنا لون تانى خالص استنى لما يجيبوه بقى .. دلوقتى كده استريح شوية او روح خدلك شيبسى .
بينديكت سابهم وراح يتكلم مع واحد كده تبع الوفد برضه.

خوليو : فرصة وجت لحد عندنا.
سكار : ايه رأيك؟؟.
خوليو : بدل ما احنا واقفين مبنعملش حاجة .
خوليو (لطوبة) : تيجى ؟؟.
طوبة : اجى فين ؟؟.
سكار : هنروح نتكلم مع بينديكت شوية ونحاول نعرفه بالاسلام .
طوبة : قشطة انا معاكم.
واتحركو الثلاثة ناحية بينديكت .


سكار : ممكن نتعرف بيك ونتكلم معاك شوية.
بينديكت : اوك مفيش مشاكل .
بينديكت : انا اسمى بينديكت .
سكار : واتس يور ناشيونالتى ؟؟.
بينديكت : انته مش بتعرف تتكلم انجليزى كويس كلمنى عربى احسن .
خوليو : طب انته جنسيتك ايه ... بلدك ايه؟؟؟.
بينديكت : انا ألمانى .
سكار : طب وفى سنة كام ؟؟.
بينديكت : انا فاضل سنتين بس قى المدرسة وبعدين اروح كوليج (كلية يعنى) وأنتم ؟؟.
خوليو : انا فى كلية الحاسبات والمعلومات (كمبيوتر سينس) وسكار فى كلية (*******) اما طوبة فى كلية (******).
طوبة : طب انته اتعلمت العربى ازاى ؟؟؟.
يينديكت : انا هنا فى مصر من 9 شهور وادرس اللغة العربية فى معهد لتعليم اللغة العربية.
طوبة : ايه رأيك فى مصر؟؟
بينديكت : بلد جميل جدا وحضارة واثار جميلة مصر.
طوبة : انا ملاحظ ان انته مخنوق وقرفان ممكن اعرف السبب؟؟.
بينديكت : انا مش عايز اعمل حاجة انا مش عارف ليه جابونا هنا وليه بنعمل ده ... انا مش عايز اشتغل (يقصد مش عايز يعمل خدمة عامة)
سكار : تعرف ايه عن الاسلام ؟؟
بينديكت : عادى يعنى اعرف كتير (معنى كلامه انه مش محتاج اننا نكلمه عن الاسلام)
خوليو : طيب بما ان انته بتعرف تقرا عربى هل قرأت القران ؟؟؟؟
بينديكت : انا عندى القران مترجم بالألمانية لكن ما قرأته.
سكار: طب ابقى اقراه علشان تعرف اكتر عن المسلمين مش معقول تقعد 9 شهور فى مصر وانته متعرفش القران ولا قريته ولا تعرف حاجة عن الاسلام.
اتضح بعد كده ان المعلومات اللى عنده عن الاسلام كلها معلومات عادية يعنى مع ان بقاله فى مصر 9 شهور الا انه مفكرش انه يتعمق شوية فى البحث عن الاسلام.

طوبة سأل بينديكت سؤال كده واتكلموا مع بعض فيه....
خوليو (لسكار) : ده ألمانى وتلاقيه بيكره اسرائيل كره العمى.
سكار (لخوليو) : اشمعنى.
خوليو : ايه يا سيكو انته نسيت هتلر و(أكذوبة) الهولوكست وان اسرائيل بتاخد من المانيا تعويضات بسبب الاضرار اللى سببها هتلر لليهود والكلام ده كله.

خوليو (لبينديكت) : ايه رأيك فى اليهود او ايه رأيك فى اسرائيل .
بينديكت بص لخوليو بصه خنيقة كده .
بينديكت : فى فرق بين اسرائيل واليهود وأنا معنديش مشكلة مع اليهود .
خوليو (باستغراب شديد) : ازاى معندكش مشكلة.
بينديكت : مالهم اليهود يعنى انا مش عارف انته ليه بتكرهوا اليهود .
طوبة : شكلوا معندوش فكرة ولا ايه ؟؟؟.
خوليو : اليهود كل يوم بيقتلوا الاطفال فى فلسطين .. وفى الاراضى المحتلة ... ازاى مش عايزنى اكرههم.
بينديكت : انته غبى تعرف كده .
خوليو سابه لانه توقع انه مش عارف يعبر بتعبير افضل من ده.


بينديكت : اللى بيقتل فى الاطفال دى الحكومة الاسرائيلية ... انا مش بحب السياسة الاسرائيلية ...لكن اليهود انا مفيش عندى مشكلة معاهم.
خوليو : والسياسة الاسرائيلية دى مش اللى بيقودها يهود واللى بينفذها دول مش يهود اللى بيموتوا الاطفال دول مش يهود.... واللى بيعملوه كل يوم ده ميتسماش ارهاب... يعنى اليهود فى اسرائيل ارهابين.
بينيدكيت : انا ممكن اقول المسليمن ارهابين.
طوبة (بصوت عالى وبتعصب شديد) : لأ المسلمين مش ارهابين .
بينديكت : انا لا اقصد ان المسلمين ارهابين ولكن انا لا احكم على كل المسلمين علشان واحد.
طوبة (بعد ان هدأ): احب اوضحلك ان اللى بيعمل اى عمليات ارهابية فهم ليسوا مسلمين ... وان كانوا مسلمين فهم لا يمتون للاسلام بصله
بينديكت : انا اقصد هذا .... انا بالنسبة ليا البشر كلهم زى بعض ولا احكم على طائفة بأكملهم بسبب شخص او فئة .
خوليو : بص يا بينديكت ... انا لا اعترف باللتى تسمى اسرائيل ... هى بالنسبة ليا اراضى محتلة... هل انته بتعترف باسرائيل؟؟؟
بينديكت : اسرائيل دولة زى اى دولة .
خوليو : ولكن دى اراضى محتلة ودى من حق الفلسطينين.
بينديكت : انا مليش علاقة .... هى اسرائيل انا اعترف بيها ...وليس لى علاقة بالماضى .
خوليو : طب انا هسألك سؤال ... انته لو انا دلوقتى جيت ضربتك على قفاك وسرقت حاجاتك هتعملى ايه.
بينديكت : هبلغ الشرطة .
خوليو : يعنى انته هتسعى انك تاخد حقك منى باى طريقة يعنى مثلا ممكن تيجى تضربنى زى ما ضربتك وتاخد حاجتك.
بينديكت : لأ انا مش هضربك لأن لو ضرتك انته هتضربنى تانى والحرب مش هتخلص.
خوليو : طب لو دلولة جت خدت جزء من المانيا هتعملوا ايه .
بينيدكت : ده مش هيحصل .
سكار : طب ما فرنسا زمان فى الحرب العالمية خدت جزء من المانيا والمانيا حاربت علشان تسترده واستردته.
بينديكت : الاوضاع دلوقتى اختلفت .
خوليو : يعنى ايه اختلفت .... دلوقتى دى ارضنا واحنا لازم فى يوم من الايام هنستردها .
بينديكت : ولكن فى ناس اتولدوا هناك .
خوليو : وفى ناس جذورهم اتولدت هناك وكل تاريخهم هناك وحياتهم كلها هناك.
بينديكت : انا مش عارف ليه انتوا بتكرهوا اسرائيل كده واليهود ليه مش عايزين سلام .
خوليو : ازاى احب واحد سرق ارضى .
بينديكت : دى مش ارضك دى ارض اليهود فى ناس اتولدوا هنا .
خوليو : ازاى ارض اليهود .... هو علشان فى ناس اتولدوا هناك بقت ارض اليهود ... طب بص يا سيدى انا بوعدك اننا نروح نحتل اللى بتسميها اسرائيل دى ونطرد كل اليهود من هناك ونرجعها للفلسطينين ونخلى ناس تتولد هناك ونقولك اصل فى ناس اتولدت هناك.
بينديكت : انته لا تفهم شئ .
سكار : اهدى يا خوليو مش كده امال .
طوبة : غيروا الموضوع يا رجالة كده مش هينفع .
وبالصدفة جه واحد زميل بينديكت ياخد منه حاجة كده فبعد عننا لمدة خمس دقايق .

خوليو : شوفو الواد بيقول ايه انا مش قادر اصدق نفسى .
طوبة : فعلا اسرائيل مبتلعبش.
خوليو : شوف ازاى قدروا يغيروا فكر الشاب الالمانى ... من كراهيةوعدواة .. الى محبة وسلام ... اساسا بين اليهود بصفة عامة والالمان عداوة فظيعة جدا .... والدليل هتلر والحزب النازى ومعاداة السامية والكلام ده كله.
سكار : احنا مش قلنا هنعرفه عن الاسلام ... سيبكوا بقى من الكلام ده وخلينا نعرفه بالاسلام احسن.

ولما جه بينديكت
سكار : الحوار مضايقك .
بينديكت : لا انا سعيد بالحوار.
سكار : تعرف ايه عن النبى محمد .
بينديكت : لا اعرف الكثير .
سكار : طب ليه محاولتش تتعرف عليه .... انته قدامك فرصه لو حبيت تسأل عنه انا ممكن اجاوبك عن اى حاجة .
بينديكت : لما احب اعرف هسأل.
سكار : الفكرة انته تسأل مين يعنى المفروض لو عايز تعرف حاجة عن نبى الاسلام تسأل المسلمين وليس اعدائهم يعنى لو عايز تعرف حاجة عن سيدنا محمد مترحش تسأل اليهود مثلا .
بينديكت : انا مش عارف انتوا ليه بتكرهوا اليهود كده عملولكو ايه كل حاجة يهود يهود.
سكار : انا لا اقصد اليهود ولكنى اقصد اى حد تانى يعنى.
خوليو : احنا لا نقصد كل اليهود ... ولكننا نقصد الصهاينة .... أو اى يهودى فى الاراضى المحتلة (اسرائيل) .... وبعدين متنساش ان اليهود كانو عايشين فى مصر وفضلوا عايشين معانا الى ان قامت دولة اسرائيل ... وساعتها بدأوا يخونو البلد اللى عاشوا واتربوا فيها وكانوا بيعملوا لصالح بلد معادى ومفيش منهم غير 26 واحد بس هما اللى مسافروش ولسه موجودين لحد دلوقتى... وده دليل ان انا مش بعادى حد علشان ديانته ... انما انا بعادى اللى بيعادينى وبيسرق ارضى وبيطرد اهلى
بينديكت : انت لا تفهم شئ ... سياسة الدولة ليس لها علاقة بالناس اللى عايشين فى الدولة
تالت مرة يتشم خوليو وخوليو يبلعها.


خوليو : ومين اللى اختار السياسة دى مش الناس اللى عايشين فيها .... مش اليهود هما اللى اختاروا الحكومة دى...مش ده كيان ديموقراطى
بينديكت : انا قلتلك انا لا تعجبنى السياسة ولكنى معنديش مشاكل مع اليهود.
خوليو: ازاى معندكش مشاكل مع اليهود امال ايه رأيك فى هتلر والحزب النازى..؟
بينديكت : هتلر كان خطأ.
خوليو : خطأ ازاى وكل الشعب الالمانى كان معاه ... وبعدين اسرائيل بتاخد من بلدك كل سنة تعويضات على الهولوكست (الأكذوبة).
بينديكت : الهولوكست حقيقة .
لسان حال خوليو وطوبة وسكار (نعم يا اخويا)

طوبة: ازاى حقيقة كل العالم عارف انها اكذوبة .
خوليو : عندك اى دليل على حدوثها فى اى صور اى فيديوهات .... انا عندى صور وفيديوهات تدل على اللى بيعمله الصيهاينة الارهابين فى الفلسطينين كل يوم انته عندك دليل.
بيندكيت : الدليل موجود فى الانترنت ابحث عنه .
خوليو : بحثت فى الانترنت ملفتش.
بينتديكت : علشان انته بتبحث بالعربى والع.....
خوليو (مقاطعا): ومين قالك انى ببحث بالعربى .
بينديكت : خلاص تعالى ألمانيا وأنا اوريك الدليل.
بينديكت : شوف فى المانيا تلاقى فى يهود كتير ويعيشوا مع الالمان بسلام وامان ده لان الالمان دايما يعتبروا الانسان انسان بدون ما ينظر الى ديانة او غيره تعرف ده ليه ؟؟؟
خوليو: ليه؟؟
بينديكت : لان احنا عندنا ديموقرطية وحرية ...كل واحد يعبد اللى هو عايزه ... كل واحد يعمل اللى هو عايزه بدون اى مشاكل انه يهودى او مسيحى او مسلم او غير .
خوليو : ومين قالك ان احنا معندناش ديموقراطية .
بينديكت : لو حسنى مبارك عمل اى حاجة هل ده بيكون ارادة الشعب المصرى ؟؟
خوليو : مش شرط .
بينديكت : كمان فى اسرائيل مش لازم تكون افعال الحكومة هى ارادة الشعب .
خوليو : ولو فرضنا انها مش ارادة الشعب مش اللى بينفذها مش هما الشعب .
بينديكت : دى سياسة ..
خوليو : هو ايه اللى دى سياسة ... كل يوم تهدم بيوت ويموت اطفال وتقولى سياسة؟
بينديكت : انته لا تفهم السياسة ... ولا تعرف الديموقراطية ولا الحرية .
خوليو (جاب اخره):بص يا بينديكت انا هجيبلك من الاخر لانى اتخنقت فعلا.... فلسطين عربية وستبقى عربية وانا لا اعترف بالكيان الصهيونى كدولة وان شاء الله هنحررها عاجلا ام اجلا ..... اما بالنسبة للحربة ... فأنا حر وهفضل طول عمرى حر وحتى لو كنت بين القضبان ... برده هفضل حر وانته عمرك ما هتفهم معنى ده ...وانا اسف مش هقدر اكمل معاك الحوار
سلم عليه وسابه مع طوبة وسكار ومشي بعيد

بعد دقايق
طوبة : ايه يا ابنى مالك .... انته سخنت عليه كده ليه.؟
خوليو : انته مش شايف ... بص بجد انا مش قادر .
سكار : تفتكر كلامنا هيأثر فيه .
خوليو : مش عارف بس من الواضح ان الحرب صعبة ... حرب الافكار مش هتنتهى واحنا لازم نعمل حاجة علشان نواجه ده


ملحوظة هامة : الحوار ده حقيقى ولكن الكلام موزع على خوليو وسكار وطوبة على حسب ما انا فاكراما كلام بينديكت فهو كما هو دون زيادة.