الأربعاء، 18 يوليو 2012

غيّرني جزاك الله خيرا :)

. الأربعاء، 18 يوليو 2012



تنويه: الفكرة اللى في المقالة دي وكل الأمثلة تقريبا اتعلمتها من مهندس فاضل سليمان في دورة التربية الايمانية اللى كانت منظماها مؤسسة جسور. ربنا ينفع بيهم جميعا ويجعلها فى ميزان حسناتهم ان شاء الله.

كل سنة كنت بحط لنفسي مستهدف لقراءة القران فى رمضان, وأقول انا ان شاء الله هختم 3 مرات الشهر ده, وبيبدأ رمضان وأول كام يوم فيه الواحد بيكون ملتزم جدا بالورد بتاعه وأحيانا بيزيد, وأحيانا كان ممكن يقرأ فى المواصلات أو فى المدرسة لما كنّا فى المدرسة أو وأنا ماشى فى الشارع ساعات علشان ألحق أخلص 3 اجزاء فى اليوم وابقى خلصت الورد بتاعي, وكل ما أيام رمضان تعدي كل ما الواحد حماسه يقل, وال 3 اجزاء المستهدف بيكونوا فى اخر 10 ايام (يا رب ألحق أختم مرة قبل ما الشهر يخلص). ويخلص رمضان والمصاحف تتركن تاني.

كنت دايما بسأل نفسي ليه القران مش بيأثر فيا وبيغيرني, ليه مش بخرج من رمضان وانا مش قادر أسيب القران ؟ ليه القراءة بتوصل بالواحد انه وللأسف الشديد بيحس أنها عبئ عليه ؟



لأن احنا بنقرأ بـ"الطريقة العالمية" اللى كلنا بنستخدمها (إلا من رحم ربي) الحق اقرأ بسرعة. حرّك لسانك بالحروف والايات علشان تاخد ثواب الحسنة ب 10 أمثالها و 70 ضعف فى رمضان. لأن احنا بنتعامل مع القران وبنفتكره بس لما حد بيموت. أو نشغله الصبح فى البيت أو العربية علشان البركة (بعد كده نشغل أي زبالة عادي).

قصة توضح ازاى احنا بنتعامل مع القران:

كان في رجل أعمال ناجح جدا وعنده مزارع كبيرة جدا وبتطلع ثمار جودتها عالية, وحصلت بعض الظروف فى البلد اللى هو فيها وحصله بعض المشاكل مع الحكومة واضطر انه يسيب البلد, وكان ليه ولاده فاعتمد انهم يديروا مزارعه. وبعد مرور فتره فى منفاه زاره أحد الأصدقاء فسأله عن المزارع وأولاده, فقال أنه الاولاد مش عارفين يديروا المزرعة لأنهم لا يفقهوا شئ لا فى الزراعة او الري أو بيع المنتجات وتسويقها أو أي شئ. فكتب رجل الأعمال كتاب شرح فيه كيفية الزراعة بالتفصيل والري وكيفية التعامل مع كل صنف من المزروعات وكيفية البيع والتسويق وكل شئ يمكن أن يحتاجه الأبناء لادارة المزارع.

وبعد مرور سنوات طويلة تغيرت الاوضاع فى البلد ورجع بلده وتوجه إلى المزارع فوجدها أرض جرداء لا زرع فيها ولا ماء, ولقى هناك بعض الشحاتين أكتشف أنهم أولاده, فسألهم


- كيف وصلتم لهذا الحال ألم يصلكم كتابي ؟
- بلى وصلنا.
- وماذا فعلتم به ؟
- طبعنا منه ملايين النسخ, ترجمناه إلى كل اللغات, نشرناه فى كل دول العالم, نقرأه كل يوم, بل أن بعضنا يحفظه عن ظهر قلب ولكن لا ندري لماذا حالنا هكذا.

هو ده حالنا مع القران, وأظن دلوقتى بقى واضح جدا ليه أنا متغيرتش بالقران فى السنين اللى فاتت, لأني كنت بتعامل مع القران أسوأ ما بتعامل مع مقال كاتب بهتم بقراء مقالته, لأني كنت بقرأ القران وعايز أخلص علشان أخد الثواب مش علشان أفهم وأتدبر وأبدأ أنفذ. لأني مكنتش بقرأ القران علشان أحس أن ده كلام ربنا ليّا أنا. أنه كتاب ربنا نزّله علشان يحللّي مشاكلي ومشاكل أمتّى, علشان يعرفني الطريق اللى هيخليني أعيش بسعادة فى الدنيا, وأروح الجنة فى الأخرة ان شاء الله.

ما هي الطريقة الصحيحة لقراء القراءن ؟

أولا: أن يكون الورد اليومي بالوقت وليس بالكمية, بمعنى أن يكون المستهدف هو قراءة القران لمدة ساعة يوميا على سبيل المثال (أو أكثر).
ثانيا: القراءة بتأني وتدبر, وإعادة الأية حتى أشعر أني فهمتها وتدبرت ما فيها بحق حتى لو اضطررت لقراءة اية واحدة فى الساعة كلها.
ثالثا: وقت القراءة يكون فقط للقراءن, فى مكان هادئ وبدون أن يشغلني أى شاغل (تليفون, انترنت, تلفزيون, حاجة مهمة نسيت أعملها).
رابعا: يمكن تقسيم الساعة على فترتين فى اليوم على ألا تقل الفترة عن 20 دقيقة (يعنى الفجرة 40 دقيقة و 20 دقيقة العصر أو 30 و 30 فى أي أوقات وهكذا).
خامسا: أن يكون وقت القراءة ذهني صافي ولا يوجد أي عوامل بدنية تؤثر على تركيزي (لو تعبان نام, لازم وقت القراءة تكون مركز).
سادسا: مفيش يوم يعدي بدون ما تقرأ فيه قران, حتى الأخوات لما بيتعذر عليها فى بعض الايام مسك المصحف برضه لازم لا يتوقفوا عن القراءة, ساعتها اقرأوا من على الكمبيوتر أو الموبايل (نسخة على الانترنت).
سابعا: كل يوم قبل ما تقرأ القران ادعى ربنا أنه يجعل القران نور قلبك وأنه يهديك بالقران ويرزقك قلب سليم.

أقولك مثال على التغيير اللى ممكن القران يعمله فيك ؟ هسألك سؤال وجاوب عليه بصراحة. لو فى أسرة فلسطينية بيتهم اتهد فى غزة وقرروا أنهم يستقروا فى مصر بس معندهمش بيت ولا فلوس ولا أي حاجة هل توافق أنهم يقعدوا معاك فى بيتك علطول ؟ بالمناسبة مش بقول يوم أو اثنين أو اسبوع لحد ما يلاقوا سكن مناسب, أنا بقول علطول.


مستغرب ليه من السؤال ؟ أمال الأنصار لما كانوا بيتخانقوا على المهاجرين علشان مين فيهم ياخد الأسرة تعيش معاهم فى نفس البيت ؟ كانوا بيعملوا قرعة مين فيهم يستضيف الأسرة فى بيتهم, وعلى فكرة المهاجرين قعدوا عند الأنصار سنين, ولما ربنا فتح على المهاجرين وبقى عندهم فلوس ويقدروا يجيبوا بيوت خاصة بيهم الأنصار زعلوا (هو احنا زعلناكم فى حاجة ؟). الأخلاق اللى كانت عند الانصار دي كانت موجودة رغم أنهم مكانش فى أيامهم فى صيام ولا جهاد ولسه مشافوش النبي صلى الله عليه وسلم. اللي عمل فى الأنصار كده وغيّرهم من قبائل بتقيم الحروب على سباق تافه هو القران الكريم.

 لو خايف أوي على الثواب, تفتكر ايه ثوابه أكبر ؟ لما تقرا القران وتدبره وتحس بمعانيه وسلوكك يبدأ يتغير طول حياتك على أساس تأثرك بالقران ؟ ولا أن لسانك يتحرك بدون ما قلبك أو عقلك أو سلوكك بتغير فى شهر واحد فى السنة ؟

ابدأ اقرأ القران بالطريقة الصحيحة وكفاية الطريقة العالمية, جرّب وقولنا حسيت بايه, بجد هتحس أنك بني أدم تاني, هتحس انك متقدرش تعيش من غير القران جرّب وأدعوا كل اللى انته تعرفهم أنهم يقرأوا القران بالطريقة الصحيحة.


فى النهاية يا ريت تدعولي جدا فى رمضان وفى غير رمضان :).


شوفوا الفيديو ده بالمرة علشان تحسوا بالنعمة اللى احنا فيها: