مـــــــــجـرَّد بـــــدايـــــة

اهداء الى
من علمنى أن الاحلام ليست مجرد خيالات ... وانما هى واقع ملموس لو سعينا باصرار الى تحقيقها.
من أثبت لى أن كل انسان مهما كانت قدراته .... يستطيع ان يقوم بأدوار لا يستطيع أن يقوم بها غيره.
من أهدانى الفرصه أن أكون فرد وسط اربعين فرد يمثلوا كيان واحد ومعنى واحد ويسعون لتحقيق نفس الهدف ونفس الاحلام.

ياسر عاشور

مع بداية دخولنا الكلية فى سنة أولى والناس بتتكلم عن أن الكلية مستواها بيقل يوم عن التانى ... وكل يومين نسمع عن دكتور من أهم دكاترة الكلية بيسيبها ... ده غير ان السنة اللى فاتت لوحدها استقال 14 معيد من الكلية لأسباب مختلفة ... لكن أغلب اللى سابها كان حزين عليها ولسان حالهم كان بيقول "لولا أن أهلك أخرجوني منك ما خرجت".

كان سهل جدا ان أى واحد فى دفعتنا يكره الكلية باللى فيها ويفقد الأمل تماما ... لولا ان كل واحد فينا كان بيصبر نفسه انه فى دفعة زى دفعتنا

شئ جميل جدا دفعتنا دى ... فعلا دفعة مبهرة ... دفعة محصلتش ... دفعة كل فرد فيها عبارة عن حالة خاصة ومش هتتكرر تانى ... فعلا بدون مبالغة ... دفعتنا عاملة زى شجرة بتثمر ثمار مختلفة ... كل ثمرة ليها شكل وطعم ورائحة مختلفة عن التانية ... وكل ثمرة ليها فايدة ... وكل ثمرة فيها حاجة بتميزها.

فعلا دفعتنا تستحق اللقب اللى اطلقه عليها دكتور/ عمر عثمان

"دفـــعــة الأمـــــل".

دفعة الأمل لأنها أول دفعة يكون فيها حب المساعدة بالصورة الغير عادية دى ... الدفعة فيها مجموعة كبير من الناس اللى بتتطوع لكتابة المحاضرات والسكاشن على الكمبيوتر وبتنزلها لزمايلها علشان يستفيدوا بدون أى مقابل.

دفعة الأمل لأنهم لما فى من الأيام حسوا أن فى حق من حقوهم حد تانى بياخده اجتمعوا وعملوا حملة مقاطعة للى بيسرق حقهم وده كان فى حملة مقاطعة النتيجة من على التليفون.

دفعة الأمل لأنها مش زى بقية الدفعات ... لأن لما حد بيتعلم حاجة جديدة كل الدفعة بتعرف انه اتعلم الحاجة دى ومش بس كده كمان بيشرح لزمايله اللى هو اتعلمه وبيفيدهم بيه.

دفعة الأمل لأن طلع منها أصغر ACM Team من أول ما بدأت الكلية ... يدخل مسابقة على مستوى الشرق الأوسط.
دفعة الأمل لأن فيها واحد زى تكنو بحبه للبرمجة وشغفه بيها وانه بيفيد دفعته بالكلام ده سواء بشروحات أو ببرامج بيعملها علشان يسهل علينا رفع المحاضرات وتنزيلها.

دفعة الأمل لأن فيها ناس زى ميمو وياسين وال sessions اللى بيدوها لسنة أولى علشان هما مش بس بيحبوا دفعتهم وبيساعدوها وانما بيحبوا الكلية وعايزينها تبقى أحسن بكل الطلبة اللى فيها.

دفعة الأمل لأن فيها ناس زى فلبينو وهارى وزيرو وبيكو وكيرى ومانشستر ومنص وروك ونجيب وعيد وحافظ وأكزيمو وبندق ورائف وجوست وبليدى وبمبو ولؤى وصاصا وبيبسى وجيمى وحس وخوليو "عايز دايما اكون معاهم :D" وناس تانية كتير أوى خايف أكون نسيت حد.

دفعة الأمل علشان فيها البنات اللى فيها وطبعا مش هقول أسامى بنات :D

دفعة الأمل علشان فيها واحد زى ياسر عاشور.
السنة اللى فاتت ياسر كان مع Meca Academy فى كلية هندسة ... وكان فخور جدا بالشغل معاهم وكان دايما بيجى يحكيلنا عنهم ويقولنا ان اللى هما بيعملوه ده محصلش قبل كده ... دايما ياسر كان على الحال ده.

لكان فى مرة من المرات اللى كان بيحكيلى فيها عن Meca قالى ان شاء الله هنحاول نعمل حاجة زى كده عندنا فى الكلية .

انا مكنتش متوقع أبدا انه كان ممكن نوصل للى احنا وصلناله ومتأكد 100% ان هو مكانش متوقع اللى احنا وصلناله.

الموضوع بدأ بفكرة اتحولت لحلم ... حلم جميل جدا وسهل أى حد يحلمه ... وسهل أوى ان أى حد يسمع الحلم ده ويقول عليه ده مستحيل.

وارد جدا ان من شهر لما ياسر كان بيكلم أى حد عن اللى نفسه يعمله يقوله "انته بتحلم".

فعلا ياسر كان بيحلم ... لكن الفرق بينه وبين أى حد كان بيحلم ساعتها ... انه كان بيحلم علشان يحقق حلمه.


أهم 3 حاجات وصّولنا للى احنا فيه

• الحلم
• الهدف
• النية

الحلم اللى حلمه ياسر فى يوم من الايام وتنمى انه ينفذه ... واحنا شاركناه نفس الحلم .

الهدف اللى كلنا كنا عايزين نحققه ... اننا نعلى بمستوى كليتنا لفوق ونحاول ننقذ ما يمكن انقاذه ونعمل اللى نقدر عليها ... كل اللى نقدر عليه.

النية اللى كانت بين كل واحد وربه ... النية اللى خلت ناس تقتطع من أوقاتها ومالها وجهدها ... وضحوا باجازات وببعض المحاضرات علشان تعمل حاجة لربنا .

انا فاكر مرة ياسر جمعنا كلنا وقالنا "اللى نيته مش لله من دلوقتى ميكملش معانا".

الموضوع بدأ ببذرة فضلت مع ياسر كتير وفى يوم من الايام فى قعدة مع دكتور أحمد حجاج فى شهر 12 رمى البذرة دى فى أرض خصبة وبدأ يرويها ويهتم بيها ويحافظ عليها من "الاشرار"وكان بيسعى أن ضوء الشمس يوصلها علشان تبدأ تنبت
وفعلا فى أقل من 4 شهور أنبتت الذرة وبدأت معالمها تظهر ... وها هى أول زهرة من زهور Support تتفتح

وزى ما ياسر دايما بيقول "دى البداية ... ودى أقل حاجة عندنا وأقل حاجة هنعملها فى حياتنا ان شاء الله"

كل الناس فى دفعتنا عندهم أحلام بتتعلق بالكلية ومصيرها وناس كتير حلمت وحققت حلمها وناس بتحلم ولسه هتحقق حلمها ان شاء الله.

لو كل حاجة حلوة دفعتنا عملتها وبتعملها وهتعملها تستحق التصفيق .... يبقى مش هنبطل تصفيق أبدا وايدينا هتوجعنا جدا:D

الأغنية دى مهداة لكل الدفعة وبالذات Support ... وبالاخص لأخويا وحبيبى ياسر عاشور ... أحــــلم مــــعايا